Bhor Election: भोरमध्ये 'हायव्होल्टेज' सामना! 'भाजपवासी' झालेल्या थोपटेंसाठी फडणवीस तर अजितदादा लाडक्या आमदारासाठी उतरणार मैदानात

Pune News : भोर नगरपालिकेची निवडणूक भाजप आणि उपमुख्यमंत्री अजित पवार यांच्या राष्ट्रवादीसाठी आता प्रतिष्ठाचा विषय बनला आहे. एकीकडे उपमुख्यमंत्री अजित पवार यांच्या राष्ट्रवादीकडून स्थानिक आमदार शंकर मांडेकर यांनी जोर लावला असून दुसरीकडे काँग्रेस मधून भाजपमध्ये आलेल्या माजी आमदार आमदार संग्राम थोपटे (Sangram Thopate) यांनी ही निवडणूक प्रतिष्ठेची बनवली आहे. आता या स्थानिक नेत्यांच्या लढाईमध्ये उपमुख्यमंत्री अजित पवार आणि मुख्यमंत्री देवेंद्र फडणवीस देखील मैदानात उतरणार असल्याचं समोर आला आहे.

भोर नगरपालिका निवडणुकीमध्ये भाजप विरुद्ध उपमुख्यमंत्री अजित पवार यांची राष्ट्रवादी काँग्रेस अशी थेट लढत होताना पाहायला मिळत आहे. उपमुख्यमंत्री एकनाथ शिंदे यांच्या शिवसेनेने देखील या निवडणुकीत उडी घेतली होती. मात्र अजित पवार यांच्या राष्ट्रवादी काँग्रेसने थेट एकनाथ शिंदे यांच्या पक्षाचा नगराध्यक्ष पदाचा उमेदवार पळून नेत त्याला पक्षप्रवेश दिला आहे.

त्यानंतर प्रचाराचा शुभारंभ करण्यासाठी आलेल्या मंत्री चंद्रकांत पाटील यांनी या ठिकाणी राष्ट्रवादी काँग्रेसचा आमदार आणि अजित पवारांची (Ajit Pawar) सत्ता असली तरी मुख्यमंत्री मात्र देवेंद्र फडणवीस आहेत. हे लक्षात ठेवूनच भोरच्या जनतेने मुख्यमंत्र्यांना मतदान करावं असं चंद्रकांत पाटील यांनी आवाहन केलं.

त्याला अजित पवारांच्या आमदारांकडून उत्तर देखील आलं अजित पवारांच्या स्थानिक आमदार शंकर मांडेकर यांनी मुख्यमंत्री जरी देवेंद्र फडणवीस असले तरी पालकमंत्री हे अजित पवार आहेत. आणि जोपर्यंत अजित पवारांच्या सहीने खालून प्रस्ताव जात नाही. तोपर्यंत मुख्यमंत्री सहीच करू शकत नाही. त्याचं भान ठेवून मतदारांनी मतदान करावं असं मांडेकर यांनी चंद्रकांत पाटलांच्या अहवानाला उत्तर दिलं आहे.

प्रतिष्ठेच्या बनलेल्या या निवडणुकीच्या प्रचाराच्या अंतिम टप्प्यात प्रचार शिगेला पोहोचला असताना उपमुख्यमंत्री अजित पवार यांची जाहीर प्रचार सभा रविवारी ३० नोव्हेंबरला शहरातील पोलिस स्टेशन समोरील राष्ट्रसंत गाडगे महाराज मैदानात होणार आहे.

तर दुसरीकडे मुख्यमंत्री देवेंद्र फडणवीस यांची जाहीर प्रचार सभा सोमवारी १ डिसेंबरला जिजामाता प्राथमिक विद्यालयच्या मैदानावर आयोजित करण्यात आली आहे. यामुळे भोर नगरपरिषद निवडणुकीतील रंगत अजून वाढली आहे.

एकीकडे स्थानिक नेत्यांकडून एकमेकांवर टोकाची टीका होत असताना आता हे दोन्ही नेते रणांगणात उतरल्यानंतर प्रचारादरम्यान झालेल्या टीकांना कशा पद्धतीने उत्तर देणार हे पाहणं महत्त्वाचं ठरणार आहे.