Ajit Pawar News: दिवंगत अजित पवारांना पुणे विद्यापीठाचा जीवनगौरव पुरस्कार जाहीर

Pune News: राज्याचे दिवंगत उपमुख्यमंत्री अजित पवार यांना त्यांच्या राजकीय क्षेत्रामधील योगदानाबद्दल सावित्रीबाई फुले पुणे विद्यापीठाचा जीवनसाधना गौरव पुरस्कार जाहीर करण्यात आला आहे, विद्यापीठाचे कुलगुरू प्रा. डॉ. सुरेश गोसावी आणि प्र-कुलगुरू प्रा. डॉ. पराग काळकर यांनी ही माहिती दिली.

सावित्रीबाई फुले पुणे विद्यापीठाचा ७७ वा वर्धापनदिन मंगळवार (१० फेब्रुवारी) सकाळी १०.३० वाजता इरावती कर्वे सामाजिक शास्त्र संकुलातील स्वराज्यरक्षक धर्मवीर छत्रपती संभाजी महाराज सभागृहात होत आहे. ज्येष्ठ शास्त्रज्ञ पद्मविभूषण डॉ. रघुनाथ माशेलकर हे या समारंभाचे प्रमुख अतिथी आहेत. यावेळी जीवनगौरव पुरस्काराचे वितरण करण्यात येणार आहे. कुलगुरू डॉ. सुरेश गोसावी, हे या समारंभाचे अध्यक्ष आहेत.

विद्यापीठाच्या वर्धापन दिनानिमित्त दरवर्षी विविध क्षेत्रात उल्लेखनीय कामगिरी बजावणाऱ्या व्यक्तींना जीवनसाधना गौरव पुरस्काराने सन्मानित करण्यात येते. अतिशय प्रतिष्ठेच्या अशा या पुरस्कारासाठी शैक्षणिक, सामाजिक, सांस्कृतिक, राजकीय, कृषी, विज्ञान, तंत्रज्ञान, उद्योग, सहकार, पर्यावरण, कला इत्यादी विविध क्षेत्रात उल्लेखनीय कार्य करणाऱ्या व्यक्तींची जीवनसाधना गौरव पुरस्कारासाठी निवड करण्यात येते.

यंदा सामाजिक आणि राजकीय क्षेत्रामधील योगदानाबद्दल अजितदादा पवार,उद्योग क्षेत्रामधील योगदानाबद्दल पद्मश्री डॉ.अशोक खाडे, सहकार क्षेत्रामधील योगदानाबद्दल अप्पासाहेब दादाबा राजळे , शिक्षण क्षेत्रातील योगदानाबद्दल प्रा. डॉ. पंडित विद्यासागर आणि कला क्षेत्रातील योगदानाबद्दल श्रीमती शमा भाटे यांना यावर्षीचा जीवनसाधना गौरव पुरस्कार जाहीर झाला आहे.