अंकिता पाटील-ठाकरे यांची कोरोना चाचणी पॉझिटिव्ह

पुणे : भारतीय जनता पक्षाचे (bjp) नेते आणि माजी सहकार मंत्री हर्षवर्धन पाटील (Harshvardhan Patil) यांच्यापाठोपाठ त्यांची कन्या अंकिता पाटील-ठाकरे ((Ankita Patil-Thackeray) यांनाही कोरोनाची लागण झाली आहे. याबाबतची माहिती त्यांनी ट्विटरच्या माध्यमातून दिली आहे. (Ankita Patil-Thackeray's corona test positive)

अंकिता पाटील-ठाकरे यांनी आपल्या ट्विटमध्ये म्हटले आहे की, माझ्या कोरोना चाचणीचा अहवाल आज पॉझिटिव्ह आलेला आहे. माझी तब्येत व्यवस्थित आहे. डॉक्टरांच्या सल्ल्याने मी पुढील उपचार घेणार आहे. माझ्या संपर्कात आलेल्या सर्वांनी आपली कोरोना चाचणी करून घ्यावी. तसेच सर्वांनी आपली काळजी घ्यावी, असे आवाहन त्यांनी ट्विटच्या माध्यमातून केले आहे.

पुणे जिल्हा परिषद सदस्या अंकिता पाटील यांचा विवाह निहार ठाकरे यांच्याशी २८ डिसेंबर रोजी झाला. त्यानंतर ३० डिसेंबर रोजी हर्षवर्धन पाटील यांच्या कोरोना चाचणीचा अहवाल पॉझिटिव्ह आला होता. थकवा जाणवू लागल्याने त्यांना डॉक्टरांच्या सल्ल्यानुसार त्यांना मुंबईतील ब्रीच कॅंडी रुग्णालयात दाखल करण्यात आले आहे.

दरम्यान, राज्यातील अनेक प्रमुख नेत्यांना कोरोनाचा संसर्ग झाला आहे. पुण्यात शनिवारी (ता. १ जानेवारी) बोलताना उपमुख्यमंत्री अजित पवार यांनी १० मंत्री आणि २५ आमदारांना कोरोना झाल्याची माहिती दिली होती. त्यातील पाच नावे कळाली असून इतर नावे अद्याप कळू शकलेली नाहीत. भाजप नेत्या पंकजा मुंडे यांनाही शनिवारी कोरोनाची सौम्य लक्षणे आढळून आली. त्यांना ओमिक्राॅमची लक्षणे दिसू येत आहेत. त्यांच्यावर मुंबई येथील घरीच उपचार सुरू आहेत. त्यांना दुसऱ्यांदा कोरोनाचा संसर्ग झाला आहे.

अधिकृत मिळालेल्या माहितीनुसार मंत्री वर्षा गायकवाड, के. सी. पडवी, बाळासाहेब थोरात, प्राजक्त तनपुरे, यशोमती ठाकूर, खासदार सुप्रिया सुळे, आमदार राधाकृष्ण विखे पाटील, सागर मेघे, शेखर निकम, इंद्रनील नाईक, चंद्रकांत पाटील (जळगाव), माधुरी मिसाळ माजी आमदार दीपक सावंत, हर्षवर्धन पाटील यांनाही कोरोनाने गाठले आहे.