Pune Anti-Encroachment Operation: अतिक्रमण विरोधी कारवाई करताना सुरक्षारक्षकाला मारहाण; पाच जण अटकेत

Pune News: अतिक्रमणाविरुद्ध कारवाई करण्यास गेलेल्या महापालिकेच्या सहायक निरीक्षकासह सुरक्षा रक्षकाला शिवीगाळ करत लाथाबुक्क्यांनी मारहाण केल्याची घटना पुण्यात मंगळवारी घडली होती. या घटनेमुळे पुण्यात एकच खळबळ उडाली.

महापालिकेच्या सहायक निरीक्षकासह सुरक्षा रक्षकाला मारहाण करणाऱ्या पाच जणांना पोलिसांकडून अटक करण्यात आली आहे. या प्रकरणी प्रशांत प्रल्हाद कोळेकर यांनी फिर्याद दिली होती. त्यानंतर पोलिसांनी ही कारवाई केली.

या प्रकरणात बंडगार्डन पोलिसांनी सातजणांविरुध्द गुन्हा दाखल केला आहे. त्यापैकी पाच जणांना आज अटक करण्यात आली आहे. गणेश परदेशी, रोहित परदेशी, रोहन परदेशी, महेश परदेशी, सूरज परदेशी, अशी अटक करण्यात आलेल्यांची नावे आहेत.

प्रशांत कोळेकर हे महापालिकेमध्ये सहायक अतिक्रमण निरीक्षक आहेत. ते मंगळवारी ए.आय.एस.एस.एम.एस. कॉलेजजवळ कैलास स्मशानभूमीकडे जाणाऱ्या रस्त्यावरील अतिक्रमण काढण्याची कारवाई करत होते. मात्र, याचवेळी ही कारवाई न करण्यासाठी आरोपींनी त्यांना शिवीगाळ करत लाथाबुक्क्यांनी मारहाण केली.

याबरोबरच सुरक्षा रक्षक आकाश लोखंडे यांनाही मारहाण करण्यात आली होती. यामध्ये ते जखमी झाले. या प्रकरणी पोलिसांनी आरोपींविरुद्ध सरकारी कामात अडथळा आणल्याप्रकरणी गुन्हा दाखल केला असून त्यापैकी पाचजणांना आज अटक करण्यात आली आहे.

Edited By- Ganesh Thombare