Atul Save News: मंत्री अतुल सावे यांच्या माजी ओएसडीवर गुन्हा; पत्नीला ठार मारण्याचा प्रयत्न, मुलालाही बॅटने मारहाण?

Pune News : राज्याच्या राजकारणातून आणि प्रशासकीय वर्तुळातून एक धक्कादायक घटना समोर आली आहे. महायुती सरकारमधील भाजपचे कॅबिनेट मंत्री यांचे माजी विशेष कर्तव्य अधिकारी (OSD) विजय धुलचंद कारंडे यांच्यावर पत्नीचा खून करण्याचा प्रयत्न केल्याप्रकरणी पुण्यात गुन्हा दाखल करण्यात आला आहे. या घटनेत कारंडे यांनी आपल्या लहान मुलालाही बॅटने बेदम मारहाण केल्याचा आरोप आहे.

ही घटना ३० एप्रिल रोजी सायंकाळी पुणे स्टेशन परिसरातील क्वीन्स गार्डन येथील सरकारी निवासस्थानी घडली. विजय कारंडे हे मोबाईलवर चॅटिंग करत असताना त्यांच्या ३० वर्षीय पत्नीने त्याबाबत विचारणा केली आणि मोबाईलचा पासवर्ड मागितला. या कारणावरून कारंडे यांचा संयम सुटला आणि त्यांनी पत्नीला शिवीगाळ करण्यास सुरुवात केली.

वादाचे रूपांतर भीषण हाणामारीत झाले. कारंडे यांनी रागाच्या भरात पत्नीला क्रिकेटच्या बॅटने बेदम मारहाण करण्यास सुरुवात केली. एवढ्यावरच न थांबता, त्यांनी पत्नीचा गळा आवळून तिला जिवे मारण्याचा प्रयत्न केला. आईला वाचवण्यासाठी त्यांचा मुलगा मध्ये पडला असता, आरोपीने पोटच्या मुलालाही सोडले नाही आणि त्याच्यावरही बॅटने हल्ला चढवला. असे तक्रारी नमूद करण्यात आले आहे.

या हल्ल्यातून महिलेने स्वतःचा बचाव केला आणि मुलासह घरातून बाहेर पडून धाव घेतली. आणि तिने पोलिसांकडे तक्रार दाखल केली. हा गुन्हा आता पुण्याच्या कोरेगाव पार्क पोलीस ठाण्यात दाखल करण्यात आला आहे.

कोण आहेत विजय कारंडे?

विजय कारंडे हे मूळचे नांदेड येथील समाजकल्याण विभागात कार्यरत आहेत. सध्या ते मुंबईतील मंत्रालयात ओबीसी कल्याण, दुग्धविकास आणि अक्षय ऊर्जा मंत्री अतुल सावे यांचे विशेष कर्तव्य अधिकारी (OSD) म्हणून प्रतिनियुक्तीवर कार्यरत होते. अतुल सावे यांच्या कार्यालयातून माहिती घेतली असता कारंडे यांनी 15 दिवसांपूर्वीच कौटुंबिक कारणास्तव काम सोडले असल्याचे सांगण्यात आले.