Bacchu Kadu : मोठी बातमी! बच्चू कडू शरद पवारसाहेबांच्या भेटीला, महाविकास आघाडीसोबत जाणार?

महायुतीत नाराज असलेले प्रहार जनशक्ती पक्षाचे अध्यक्ष, आमदार बच्चू कडू राष्ट्रवादी काँग्रेसचे ( शरदचंद्र पवार ) अध्यक्ष शरद पवारसाहेबांच्या भेटीसाठी पुण्यातील मोदी बाग या निवासस्थानी आले आहेत. बच्चू कडू यांनी महायुती सरकारला 'अल्टिमेटम' दिला आहे. यातच शरद पवारसाहेबांची ( Sharad Pawar ) भेट घेण्यासाठी आल्यानं आमदार कडू महायुतीतून बाहेर पडणार का? या चर्चांना उधाण आलं आहे.

याबद्दल पुण्यात प्रसारमाध्यमांशी संवाद साधताना बच्चू कडू ( Bacchu Kadu ) म्हणाले, "ही भेट अगोदरच ठरली होती. आम्ही सरकारला काही मुद्द्यांबाबत निवेदन दिलं आहे. त्याच मुद्द्यांवर पवारसाहेबांशी चर्चा करणार आहे. जसे जाती-धर्मावर राजकारण होते. तसे, शेतकरी, शेतमजूर, दिव्यांग अशा मुद्द्यांवर राजकारण झालं पाहिजे."

विधानसभेला 'मविआ'सोबत जाणार का? या प्रश्नावर बच्चू कडू यांनी म्हटलं, "अजून तसे काही ठरलं नाही. 1 सप्टेंबरपर्यंत महायुती सरकारला 'अल्टिमेटम' दिला आहे. महायुतीत मी खूश असो किंवा नसो. शेतकरी, मजूरांचे प्रश्न महत्त्वाचे आहेत. त्यांच्या नाराजीचा सूर नेहमी आम्ही सरकारसमोर ठेवत असतो."

"शेतकरी आणि मजुरांचे प्रश्न, कर्जमाफी, दिव्यांगाच्या घरकुलाच्या प्रश्नाबाबत शरद पवारसाहेबांशी चर्चा करणार आहे," असं बच्चू कडू यांनी स्पष्ट केलं.

राणा दाम्पत्याला कंटाळून महाविकास आघाडीत जाणार असल्याचं बोललं जात आहे. याप्रश्नावर बच्चू कडू म्हणाले, "मला कुणी वैतागू शकत नाही. माझा वाद त्यांच्याबरोबर आहे. पण, विषय एवढा महत्त्वाचा नाही."