Bala Bhegade: भेगडेंचा शेळकेंना इशारा! आरोप आठ दिवसांत सिद्ध करा, अन्यथा अब्रुनुकसानीचा दावा दाखल करू

Bala Bhegade Vs Sunil Shelke : वडगाव मावळ : ईव्हीएम मशीन हॅक करण्याच्या नावाखाली पैसे उकळल्याबाबत केलेला आरोप आठ दिवसांत सिद्ध करा अन्यथा अब्रुनुकसानीचा दावा दाखल करू, असा इशारा भाजचे नेते, माजी राज्यमंत्री बाळा भेगडे व भाजप किसान मोर्चाचे प्रदेशाध्यक्ष गणेश भेगडे यांनी आमदार सुनील शेळके यांना दिला.

स्थानिक स्वराज्य निवडणुकांबाबत युतीचा प्रस्ताव आणि ईव्हीएमबाबत आमदार शेळके यांनी केलेले आरोप यावेळी गणेश भेगडे यांनी फेटाळून लावले. आठ दिवसांत आरोप सिद्ध करा अन्यथा अनुसानीचा दावा दाखल करण्यात येईल. आरोप सिद्ध झाल्यास आम्ही राजकारणातून बाजूला होऊ, असे भेगडे म्हणाले.

तळेगाव नगरपरिषदेमध्ये पक्षाचा व राष्ट्रीय स्वयंसेवक संघाचा कार्यकर्ता नगराध्यक्ष होणार म्हणून आम्ही युतीची तयारी दाखवली; परंतु आमदार शेळके यांनी युती धर्म पाळला नाही. यातून धडा घेत आम्ही युतीबाबत सावध भूमिका घेतली. जिल्हा परिषद निवडणुकीत युतीबाबत चर्चा झाली नाही. खोटे आरोप करून आमदार शेळके आमच्यात वाद लावत आहेत. जिल्हा परिषद, पंचायत समिती निवडणुकीत जनतेचा कौल व पराभवाची जबाबदारी आम्ही स्वीकारली आहे, असे भेगडे म्हणाले.

भाजपचे निवडणूक प्रमुख बाळासाहेब नेवाळे, कोअर कमिटीचे अध्यक्ष निवृत्ती शेटे, माजी सभापती गुलाबराव म्हाळसकर, शांताराम कदम, सहकार आघाडीचे अध्यक्ष बाबूलाल गराडे उपस्थित होते.