Baramati bypoll : काँग्रेससह तीन राष्ट्रीय पक्ष संपर्कात; हाकेंनी बारामती पोटनिवडणुकीत आणला ट्विस्ट

Pune News : दिवंगत उपमुख्यमंत्री अजित पवार यांच्या निधनानंतर रिक्त झालेल्या बारामती विधानसभेच्या जागेसाठी पोटनिवडणूक जाहीर करण्यात आली आहे. ही निवडणूक बिनविरोध व्हावी, यासाठी सत्ताधारी पक्षासह अन्य काही पक्ष आग्रही आहेत. असं असतानाही निवडणूक कोणत्याही परिस्थितीत बिनविरोध होऊ देणार नाही, असा पवित्रा ओबीसी आंदोलक लक्ष्मण हाके यांनी घेतला आहे.

सुरुवातीला बारामती पोटनिवडणुकीमध्ये स्वतः लक्ष्मण हाके निवडणूक मैदानात उतरणार असल्याच्या चर्चा सुरू होत्या. मात्र आता आंदोलनातील एखाद्या कार्यकर्त्याला या निवडणुकीत उतरवण्याबाबत सुतोवाच त्यांनी केला आहे. त्यामुळे लक्ष्मण हाके यांच्या निवडणूक लढण्यावर प्रश्नचिन्ह उपस्थित झाला आहे.

याबाबत लक्ष्मण हाके यांनी सांगितलं की, बारामती व राहुरी पोटनिवडणूक आम्ही स्वतः लढू किंवा चळवळीतला एखादा पदाधिकारी उभा करू. याबाबतचा निर्णय आम्ही घेणार असून येत्या दोन दिवसांमध्ये तो जाहीर करू. नेमकं कोण उमेदवार असेल याबाबतचा निर्णय बैठक घेऊन फायनल करणार असल्याचं हाके यांनी सांगितलं.

हाके पुढे म्हणाले, निवडणुक लोकशाहीच्या पद्धतीने झाली पाहिजे. सहानुभूती म्हणून निवडणुका बिनविरोध होऊ शकत नाही. यापूर्वी देखील अजित पवार यांनी दिवंगत आमदार लक्ष्मण जगताप आणि रमेश वांजळे यांच्या पोटनिवडणुकीमध्ये उमेदवार दिलेले होते. त्यामुळे ही निवडणूक कोणत्याही परिस्थितीत बिनविरोध होणार नाही.

ही निवडणूक धनशक्ती विरुद्ध कार्यकर्ता अशी निवडणूक होणार आहे. वेळप्रसंगी मी उमेदवार होईल अथवा नाही मात्र बारामतीची पोटनिवडणूक बिनविरोध होऊ देणार नाही. सहानुभूतीच्या जोरावर निवडणुका बिनविरोध होत असतील तर हे लोकशाहीसाठी धोकादायक आहे. लोकशाहीत निवडणुकीला काय महत्त्व हे प्रगल्भ नागरिकांना माहीत आहे, असे हाके म्हणाले.

बारामती पोट निवडणुकीसाठी अनेक राष्ट्रीय पक्ष आमच्या संपर्कात आहेत. यामध्ये आप, बसपा आणि काँग्रेस सारखे पक्ष आहेत. या पक्षांनी अधिकृत भूमिका जाहीर केल्यानंतर आम्ही भूमिका जाहीर करणार आहोत. यामध्ये स्थानिक पक्षाने देखील आम्हाला पाठिंबा दर्शवला आहे. ‘ये अंदर की बात है बहुत लोक हमारे साथ है’, असं हाके म्हणाले.