Kishor Aware Murder Case : किशोर आवारे हत्याप्रकरणाचा मास्टरमाईंड भानू खळदेला अटक; पिंपरी चिंचवड पोलिसांची कारवाई

Kishor Aware Murder Case :  पुण्यात दोन महिन्यांपूर्वी तळेगाव दाभाडे येथे झालेल्या किशोर आवारे यांच्या हत्याप्रकरणात एक महत्त्वाची अपडेट समोर आली आहे.  किशोर आवारे (Kishor Aware) यांच्या हत्याप्रकरणातील मुख्य आरोपी माजी नगरसेवक भानू खळदे (Bhanu Khalde) याला पिंपरी-चिंचवड पोलिसांच्या (Pimpri Chinchwad Police) गुंडा स्कॉड पथकाने नाशिकमध्ये अटक केली आहे.

गेल्या दिड महिन्यांपासून मास्टरमाईंड भानू खळदे पोलिसांना गुंगारा देत होता. अखेर गुंडा स्कॉडच्या पथकाने खळदेला अटक केली आहे. सामाजिक कार्यकर्ते किशोर आवारे यांचा यावर्षी १२ मे रोजी भरदिवसा नगरपरिषद कार्यालय आवारातच खून केला होता.

किशोर आवारे यांची हत्या केल्यानंतर मुख्य संशयित भानू खळदे गेल्या दोन महिन्यांपासून फरार होता. अखेर पिंपरी चिंचवड पोलिसांनी त्याला नाशिकमधून अटक केली आहे. प्राथमिक तपासानुसार, माजी नगरसेवक भानू खळदे यांचा मुलगा गौरव खळदे यानेच आवारे यांच्या हत्येचा कट रचल्याची कबुली दिली होती. वडिलांच्या मारहाणीचा बदला घेण्यासाठी गौरव खळदेने आवारे यांची हत्या केली.

काही महिन्यांपुर्वी माजी नगरसेवक भानू खळदे आणि  किशोर आवारे (Kishor Aware)  यांच्यात वाद झाला होता. त्यावेळी किशोर आवारे यांनी खळदे यांच्या कानशिलात लगावली होती. याच रागातून गौरवने नगरपरिषदेच्या कार्यालयाच्या आवारातच किशोर आवारे यांची हत्या घडवून आणली होती.

अपमानाचा बदला घेण्यासाठी भानू खळदे आणि गौरव खळदे या बापलेकाने किशोर आवारेंच्या हत्येचा कट रचला. 12 मे रोजी नगरपरिषद कार्यालयासमोरच गौरव खळदे याच्यासह त्याच्या काही साथीदारांनी आवारे यांची हत्या केली. भानू खळदे त्यानंतर फरार झाला, पण पिंपरी-चिंचवड पोलिसांनी 24 तासांच्या आतच या प्रकरणातील आरोपींना बेड्या ठोकल्या. आरोपींनीही भानू खळदेचा मुलगा गौरव खळदेच्या सांगण्यावरून हत्या केल्याची कबूली दिली. तेव्हापासून पिंपरी चिंचवड पोलिसांनी भानू खळदेचा शोध सुरू होता.

Edited By- Anuradha Dhawade