BJP News: पिंपरी चिंचवडमध्ये भाजपचे 'मोदी@9' अभियान; आमदार अश्विनी जगतापांनी सांगितले भाजपच्या यशाचे गमक

पिंपरी : पंतप्रधान नरेंद्र मोदी यांच्या केंद्रातील सरकारला नऊ वर्ष पूर्ण झाल्याबद्दल भाजपकडून 'मोदी@9' हे अभियान सध्या सुरु आहे. त्याच्या शेवटच्या टप्प्यात चिंचवड विधानसभेची टिफीन बैठक झाली. त्यात पक्षाच्या यशाचे गमक स्थानिक आमदार अश्विनी जगताप यांनी सांगितले.

भाजप हा फक्त पक्ष नसून एक परिवार असून तेच पक्षाच्या यशाचे गमक आहे, असं आमदार जगताप म्हणाल्या. त्यातूनच भाजप हा जगातील सर्वात मोठा राजकीय पक्ष झाल्याचेही त्यांनी सांगितले. केंद्र सरकारची मागील नऊ वर्षातील कामे पोहचविण्याचे हे 'मोदी@9' अभियान 1 जूनपासून देशभर सुरु झालेले आहे. त्याच्या शेवटच्या टप्यातील चिंचवड भाजपची टिफीन बैठक बुधवारी सांगवीत झाली.

'मोदी@9'चे चिंचवड विधानसभा संयोजक व जिल्हा सरचिटणीस ॲड.मोरेश्वर शेडगे, पिंपरी महापालिकेतील माजी पक्षनेते नामदेव ढाके, माजी नगरसेवक संदीप कस्पटे, हर्षल ढोरे, सागर आंघोळकर, शेखर ओव्हाळ, अश्विनी चिंचवडे, प्रदेश सदस्य संतोष कलाटे, पुणे जिल्हा नियोजन समिती सदस्य काळूराम नढे, तसेच मधुकर बच्चे यांच्यासह जिल्हा व मंडल पदाधिकारी, शक्तीकेंद्र प्रमुख त्यात सहभागी झाले होते.

त्यांनीच नाही, तर आमदार जगतापांनीही या बैठकीसाठी घरून जेवणाचे डबे आणले होते. केंद्रात पुन्हा मोदी सरकार आणण्यासाठी पदाधिकाऱ्यांनी, कार्यकर्त्यांनी योगदान द्यावे, असे आवाहन जगताप यांनी यावेळी केले.

उद्योगनगरीतील तीनपैकी भोसरी आणि चिंचवड या दोन विधानसभा मतदारसंघात भाजपचे आमदार (महेश लांडगे आणि अश्विनी जगताप) आहेत. तेथे आज ही टिफीन बैठक झाली. तर, अण्णा बनसोडे हे राष्ट्रवादीचे आमदार असलेल्या शहरातील पिंपरी या तिसऱ्या विधानसभा मतदारसंघात मात्र, ती अगोदरच घेण्यात आली आहे.

उद्या 'मोदी@9' मोहिमेची सांगता होणार आहे. त्यानंतरच शहर भाजपला नवा अध्यक्ष मिळण्याची शक्यता आहे. कारण 'मोदी@9' महाजनसंपर्क अभियानामुळेच पिंपरी चिंचवड शहर भाजप अध्यक्षपद नियुक्तीच नाही तर राज्यातील विविध ठिकाणच्याही नियुक्त्याही रखडलेल्या आहेत.

Edited By : Ganesh Thombare