Cash Seized in Kasaba and Chinchwad : निवडणुकीत खेळ पैशांचा! चिंचवडध्ये ४३ लाख तर कसब्यात ५ लाखांची रोकड जप्त

Election Commision - पुणे जिल्ह्यातील चिंचवड आणि कसबा मतदार संघात पोटनिवडणुकीची धामधूम सुरू आहे. या मतदारसंघात भाजप आणि महाविकास आघाडीकडून जोरदार प्रचार सुरू आहे. या तापलेल्या वातावरणात निवडणूक आयोगाने चिंचवडमधून ४३ लाख तर कसब्यातून पाच लाख रुपयांची रोकड जप्त केली आहे.

ही रक्कम मतदारांन वाटण्यास आणल्याची शक्यता वर्तविण्यात येत आहे. दरम्यान दोन्ही ठिकाणी प्रशासनाची तयारी चांगली झाल्याचे राज्याचे मुख्य निवडणूक अधिकारी श्रीकांत देशपांडे यांनी सांगितले.

राज्याचे मुख्य निवडणूक अधिकारी श्रीकांत देशपांडे यांनी २६ तारखेला मतदान होत असलेल्या कसब्यासह चिंचवडबाबत ही तसेच निवडणूक तयारीची माहिती दिली. मतदारसंख्या विचारात घेता चिंचवड हा राज्यात सर्वात मोठा मतदारसंघ आहे.

तेथे आजअखेर ४३ लाखांची रोकड, पाच लाख रुपयांची दारू, ९५ हजारांचा गांजा असा ४९ लाख रुपयांचा ऐवज जप्त करण्यात आला आहे. त्यातुलनेत कसब्यात निवडणूक विभागाची ही कारवाई कमी म्हणजे दहा लाख एवढी झाली आहे. तेथे पाच लाखाची रोकड, २१ हजाराची दारू आणि पाच लाख रुपयांचे २५ ग्राम एमडी हा मादक पदार्थ पकडण्यात आले आहे.

निवडणूक प्रकियेच्या संचालनाच्या कामकाजावर देखरेख करण्यासाठी भारत निवडणूक आयोगामार्फत दोन सर्वसाधारण निरिक्षक, दोन पोलीस निरिक्षक व दोन खर्च निरिक्षकांची नेमणूक केलेली आहे. दोन्ही मतदार संघात निवडणूक प्रकिया पार पाडण्यासाठी आवश्यक असलेला अधिकारी व कर्मचारी वर्ग उपलब्ध आहे.

चिंचवडसाठी दोन हजार ५५० तर कसबापेठसाठी एक हजार ३५० मतदान कर्मचारी नियुक्त आहेत. चिंचवडला ४७ व कसबापेठमध्ये २५ झोनल अधिकाऱ्यांची नेमणूक केली. चिंचवडमधील संवेदनशील केंद्रासाठी १५ व कसबापेठसाठी ११ सुक्ष्म निरिक्षकांची नियुक्ती केलेली आहे.

कायदा व सुव्यवस्थेसाठी चिंचवडला सीआरपीएफ, सीआयएसएफ, आयटीबीपीच्या प्रत्येकी एक कंपनी, आरपीएफच्या दोन कंपन्या दाखल झाल्या आहेत. कसबापेठसाठी सीएपीएफच्या पाच कंपन्या दाखल आहेत.

पुणे शहर पोलीस विभागाचे कसब्यासाठी दीड हजार पोलीस, पिंपरी-चिंचवड पोलीस विभागाकडून चिंचवडसाठी ८३८ पोलीस व १६९ होमगार्ड यांच्या मार्फत बंदोबस्त केला जाणार आहे. याबाबत माहिती राज्याचे मुख्य निवडणूक अधिकारी श्रीकांत देशपांडे यांनी दिली आहे.