Pune News : स्थानिक स्वराज्य संस्थांच्या निवडणुकांमध्ये महायुतीतील मित्रपक्ष एकमेकांविरोधात उभे ठाकल्याचं पाहायला मिळत आहेत. निवडणुकीच्या प्रचारात देखील मित्रपक्षातील नेते एकमेकांवर टोकाची टीका करताना दिसून येत आहे. एकूणच महायुतीमधील मित्रपक्षांमध्ये नगरपालिका आणि नगरपंचायतीच्या निवडणुकीच्या निमित्ताने दंगा सुरू असल्याचं पाहायला मिळत आहे.
केंद्रीय मंत्री आणि आरपीआयचे नेते रामदास आठवले (Ramdas Athwale) यांनी सर्व परिस्थितीवर आपल्या खास शैलीमध्ये कविता करत मिश्किल टिप्पणी केली आहे. रामदास आठवले म्हणाले, नगरपालिकेच्या निवडणुकांमध्ये विरोधी पक्ष होणार आहे नंगा, त्याचमुळे महायुतीत सुरू आहे दंगा.
आठवले पुढे म्हणाले, आगामी स्थानिक स्वराज्य संस्था निवडणुकांमध्ये महायुतीकडून (Mahayuti) रिपब्लिकन पक्षाला पुरेसे प्रतिनिधित्व मिळावे, अशी आमची अपेक्षा आहे. राज्यभरात भाजपसोबत रिपब्लिकन पक्ष महायुतीमध्येच निवडणुका लढवेल अशी अपेक्षा आहे. त्यामुळे युतीमध्ये रिपब्लिकन पक्षाला योग्य जागा मिळाव्या. मुंबई महापालिकेत 17 ते 18 तर पुणे महापालिकेत 20 जागा मिळाव्या अशी आमची अपेक्षा आहे, असे आठवले यांनी स्पष्ट केले.
महायुतीच्या, विशेषतः आमची नैसर्गिक युती असलेल्या भाजपच्या स्थानिक नेत्यांनी आमच्या स्थानिक नेत्यांशी निवडणुकीच्या युती संदर्भात चर्चा करावी आणि योग्य प्रतिनिधित्व द्यावे, असेही आठवले म्हणाले. या संदर्भात मुख्यमंत्री देवेंद्र फडणवीस आणि भाजप प्रदेशाध्यक्ष रवींद्र चव्हाण यांच्याशी आपण चर्चा करणार असल्याचेही त्यांनी सांगितले.
पुणे महापालिकेसाठी 20 प्रभागांची यादी पक्षाने तयार केली असून ती भाजपचा नेतृत्वाकडे सोपविण्यात आली आहे. पुणे महापालिकेची यादी ज्येष्ठ मंत्री चंद्रकांत पाटील आणि केंद्रीय राज्यमंत्री मुरलीधर मोहोळ यांच्याकडे ही यादी देण्यात आली असल्याचं आठवले यांनी स्पष्ट केलं.
अनेक वर्षांपासून रखडलेल्या नगरपालिका आणि नगरपंचायतीच्या निवडणुका आता होत असल्यामुळे या निवडणुकीत इच्छुकांची मोठ्या प्रमाणात आहे आणि बंडखोरी देखील अधिक प्रमाणात झाली आहे. अनेक ठिकाणी महायुतीतील पक्ष एकमेकांसमोर उभे ठाकले आहेत. मात्र, या निवडणुकांच्या युती, आघाडीचे अधिकार स्थानिक पातळीवर दिले गेले असले तरी देखील प्रचारादरम्यान महायुतीमध्ये बेबनाव निर्माण होईल अशी विधाने घटक पक्षांच्या स्थानिक अथवा प्रदेश पातळीवरील नेत्यांनी करू नयेत, असे आवाहनही आठवले यांनी केले.
सध्याच्या निवडणुका पैशाच्या आधारावर लढवल्या जात असल्याचा आरोप राष्ट्रवादी काँग्रेस शरदचंद्र पवार पक्षाचे प्रमुख शरद पवार यांनी केला आहे. त्यावर आठवले म्हणाले, गोरगरिबांना उपयुक्त ठरणाऱ्या योजना राबवणे हा आमचा अधिकार आहे आणि ते आमचे कर्तव्य देखील आहेत, असे त्यांनी स्पष्ट केले. विरोधकांकडे सत्ता असताना त्यांना अशा योजना राबवता आल्या नाहीत, अशी टीकाही त्यांनी केली
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.