Chinchwad : अजित पवार - राहुल कलाटे - नाना काटे रात्री दोन वाजेपर्यंत एकत्र बसले : मार्ग का निघाला नाही?

Chinchwad By Election Result : चिंचवड विधानसभा पोटनिवडणुकीच्या निकालानंतर राष्ट्रवादीच्या पराभवाभोवती चर्चा घडून येताना दिसून येत आहे. अपक्ष उमेदवार राहुल कलाटे यांच्यामुळे महाविकास आघाडी विजयापासून 'वंचित' राहिली असे, अनेक विश्लेषण व्यक्त होऊ लागले आहेत. दरम्यान कलाटे यांना उमेदवारी देण्याबाबत विरोधीपक्ष अजित पवार आग्रही होते अशी चर्चा होत होती. यावर आता स्वत: अजित पवार (Ajit Pawar) यांनी मौन सोडले आहे.

अजित पवार यांनी एका वृत्तवाहिनीला मुलाखत देताना कलाटे यांच्या उमेदवारीबद्दल भाष्य केले आहे. 'चिंचवड विधानसभा निवडणुकीत एक चर्चा अशी होती की, ठाकरे गटाचे नेते राहुल कलाटे यांच्याकडे तुमचा थोडा झुकाव होता. तुम्हाला वाटत होतं की, राहुल कलाटेंना पक्षाची उमेदवारी द्यावी. कारण मागील निवडणुकीतही त्यांनी चांगली मते घेतली होती. पण, तुमच्यावर काही दबाव होता का? असा प्रश्न अजित पवारांना विचारण्यात आला.

यावर उत्तर देताना अजित पवार म्हणाले, "आमच्यावर असा कोणाचा दबाव नसतो. आम्ही निर्णय घेताना सगळे मिळून निर्णय घेतो. उमेदवारी फॉर्म भरायच्या दिवशी मी स्वत: पवार साहेब, उद्धव ठाकरे, जयंत पाटील यांच्याशी चर्चा केली होती."

"आदल्या रात्री दोन वादेपर्य़ंत पुण्यामध्ये आम्ही सर्व जण होतो. विलास लांडे, संजोग वाघेरे, अजित गव्हाणे, नाना काटे, राहुल कलाटे आम्ही सगळे जण बसलो होतो. यातून मार्ग निघावा, दोघांपैकी एकाने लढवावी. पण दुर्दैवाने यातून मार्ग निघाला नाही," असे अजित पवार म्हणाले.