Rupali Chakankar: मोठी बातमी: चाकणकरांच्या अडचणी वाढणार? आधी महिला नेत्यांकडून 'टार्गेट', आता थेट आयोगातच...

Pune News : पुण्यातील वैष्णवी हगवणेच्या संशयास्पद मृत्यू प्रकरणी राज्य महिला आयोगाच्या अध्यक्षा रूपाली चाकणकर यांच्यावर चौफेर टीका होत असल्याचं दिसून येत आहे. चाकणकरांविरोधात विरोधी पक्षांतील महिला नेत्यांसह स्वपक्षीय नेत्यांनीही आघाडी उघडली असल्याचं समोर आलं आहे. आता याचदरम्यान,चाकणकरांच्या अडचणी वाढण्याची शक्यता आहे.

राज्य महिला आयोगाच्या अध्यक्षा रुपाली चाकणकर (Rupali Chakankar) यांच्या अडचणीमध्ये वाढ होण्याची शक्यता आहे. कारण वैष्णवी हगवणे मृत्यूप्रकरणी एकीकडे राज्यातील अनेक महिला नेत्यांनी रुपाली चाकणकर यांच्या राजीनाम्याची मागणी केली आहे. असतानाच आता राज्य महिला आयोगाच्या अध्यक्ष रुपाली चाकणकर यांच्या विरोधातच राज्य महिला आयोगात तक्रार करण्यात आली आहे.

राज्य महिला आयोगाच्या अध्यक्षा रूपाली चाकणकर यांच्या कार्यकर्त्या व राष्ट्रवादी काँग्रेस पक्ष युवती सेलच्या पश्चिम महाराष्ट्र अध्यक्ष सोनाली गाडे यांनी,सामाजिक कार्यकर्त्या संगिता भालेराव यांना फोन करून धमकी दिल्याप्रकरणी, भालेराव यांनी राज्य महिला आयोग,मुख्यमंत्री कार्यालय व पुणे पोलीस आयुक्तांकडे तक्रार दाखल केली आहे. यामुळे आता राजकीय वातावरण तापणार आहे.

वैष्णवी हगवणे (Vaishnavi Hagawane) मृत्यू प्रकरणामध्ये महिला आयोगाच्या अध्यक्षा रूपाली चाकणकर यांनी त्यांची भूमिका योग्य पद्धतीने बजावली नसल्याचा आरोप करत विरोधी पक्षातील त्यांना टार्गेट केले. त्यांच्याविरोधात टीकेची झोड उठवली आहे. चाकणकरांना विरोधी पक्षातील महिला नेत्यांनी घेरलेला असतानाच स्वपक्षातील असलेल्या रूपाली पाटील ठोंबरे यांनी देखील चाकणकरांना घेरण्याचा प्रयत्न केला आहे.

रुपाली पाटील ठोंबरे यांनी वैष्णवी हगवणे प्रकरणांमध्ये महिला आयोगाच्या भूमिकेबाबत शंका व्यक्त करत या प्रकरणातील आयोगाच्या भूमिकेची चौकशी करण्यात यावी, अशी देखील मागणी केली आहे. त्यानंतर अजित पवार यांच्या राष्ट्रवादी काँग्रेस मधील दोन महिला नेत्यांमध्येच आरोप प्रत्यारोपाचे सोशल मीडियावर रंगले असल्याचे पाहायला मिळत आहे.

या वादामध्ये ठाकरे गटाच्या नेत्या सुषमा अंधारे यांची देखील भूमिका पाहायला मिळाली. अंधारे यांनी सोशल मीडियावरती पोस्ट करत वैष्णवी हगवणे प्रकरणांमध्ये महिला आयोगाचे अध्यक्ष रुपाली चाकणकर यांनी असंवेदनशीलला दाखवली असली तरी ठोंबरेंच्या रूपाली यांनी दाखवलेली संवेदनशीलता, वैष्णवीचे बाळ कुटुंबीयांकडे सुपूर्द करण्यासाठी घेतलेला पुढाकार प्रशंसनीय आहे. असे म्हटले होते.

यानंतर आता रूपाली चाकणकर फॅन क्लब या फेसबुक पेजवरून रूपाली पाटील ठोंबरे यांचा एक जुना व्हिडिओ पोस्ट करण्यात आले असल्याचे रूपाली ठोंबरे पाटील यांनी सांगितला आहे. जुने व्हिडिओ टाकून माझी बदनामी करण्यात येत असल्याचे देखील रुपाली ठोंबरे पाटील यांनी म्हटले आहे.

याबाबत ठोंबरे पाटील यांनी फेसबुकवर पोस्ट केली आहे. त्यात ठोंबरे पाटील म्हणाल्या, रुपाली चाकणकर अकाऊंट वरून माझ्या पेजचे जुने व्हिडिओ टाकत आहेत 2017, 2018 ला घडलेली घटना त्यावेळी सर्व मीडियावर आले आहेत तपासून घेत जा बरे. तोंडावर आपटणार नाहीत म्हणजे. हो माझे व्हिडिओ आहे मंडई पोलिस चौकीतला. महिलेचा अश्लील व्हिडिओ आणि अत्यंत घाण टिप्पणी केली होती.आणि वेड्याचे सोंग घेत होता तो विकृतावर गुन्हाही दाखल केला. तेव्हा चाकणकर आयोगावर नव्हती बरं का?

तुम्ही आयोगावर राहून महिलेची तक्रार टाळाटाळ करण्यापेक्षा डायरेक्ट पीडित महिलेला न्याय आणि विकृतीला त्याच भाषेत उतर देऊन महिलेला दिलेला आधार महत्त्वाचा असतो. तो नाही कळणार चाकणकर व त्याच्या चेल्याना असो. होऊ द्या वायरल आम्ही न्याय देतो. अगदी बेधडक कोणतीही लाचारी न पत्करता, अशी टीका रूपाली ठोंबरे पाटील यांनी केली आहे.

राष्ट्रवादी काँग्रेस शरदचंद्र पवार पक्षाच्या प्रदेशाध्यक्षा रोहिणी खडसे, मुंबईच्या माजी महापौर आणि शिवसेना उद्धव बाळासाहेब ठाकरे पक्षाच्या नेत्या किशोरी पेडणेकरांसह सुषमा अंधारे यांनीही रुपाली चाकणकर आणि महिला आयोगावर गंभीर आरोप केले आहेत. तसेच राज्याचे उपमुख्यमंत्री आणि राष्ट्रवादी काँग्रेसचे राष्ट्रीय अध्यक्ष अजित पवारांना याबाबत एक पत्र लिहिलं आहे. या पत्रामध्ये सुषमा अंधारे यांनी महिला आयोगाच्या अध्यक्ष रूपाली चाकणकर यांच्याबाबत गंभीर आरोप केले आहेत. हे पत्र सुषमा अंधारे यांनी सोशल मीडियात पोस्ट केले आहे.