Sangram Thopte : काँग्रेस आमदार थोपटे फडणवीसांना भेटले आणि आता केला 'हा' खुलासा...

वेल्हे : उपमुख्यमंत्री देवेंद्र फडणवीस यांच्याशी झालेल्या आमदार थोपटे यांच्या भेटीने राजकाणात खळबळ उडाली होती. काँग्रेसचा (Congress) बडा नेता भाजपमध्ये जाणार अशा चर्चा सुरू झाल्या होत्या. मात्र या भेटीवर खुद्द आमदार संग्राम थोपटे यांनी खुलासा केला असून देवेंद्र फडणवीस यांच्या भेटीवर संग्राम थोपटे यांनी पडदा टाकला आहे.

''मी काँग्रेसमध्येच आहे, काँग्रेसमध्येच होतो आणि काँग्रेसमध्येच राहणार, काहीजण उगीच बातम्या पेरण्याचे काम करत आहेत. असा खुलासा भोर, वेल्हा, मुळशीचे आमदार संग्राम थोपटे यांनी केला आहे. वेल्हे तालुक्यातील वांगणी येथील विविध विकास कामांचे भूमिपूजन कार्यक्रमाचे आयोजन रविवारी (ता.०८) संग्राम थोपटे यांच्या हस्ते करण्यात आले. यावेळी ते बोलत होते.

दोन दिवसांपूर्वी संग्राम थोपटे यांनी उपमुख्यमंत्री देवेंद्र फडणवीस (Devendra Fadnavis) यांची भेट घेतली होती. त्यावरून काँग्रेसचा बडा नेता भाजपमध्ये जाणार अशा चर्चा सुरू झाल्या होत्या. संग्राम थोपटे यांनी खुलासा देखील केला होता. ''मी माझ्या मतदार संघातील कामाची चर्चा करण्यासाठी त्यांच्याकडे गेलो होतो'', असे त्यांनी सांगितले होते.

''मी माझ्या वडिलांचे तत्वज्ञान पाळले आहे, त्याच तत्त्वज्ञानावर चालणार असून राजकारणात प्रत्येक वेळेस आपल्यालाच काही मिळाले पाहिजे असे नसते. तालुक्याच्या विकासाबाबत विरोधी पक्षातील नेत्यांना भेटत असेल तर त्यास मला कमीपणा वाटत नाही'', असे संग्राम थोपटे यांनी स्पष्ट केले. ''ठेविले अंनती तेसेची राहावे, चित्ती असु द्यावे समाधान'', असा दाखला देत त्यांनी या चर्चेला पूर्ण विराम दिला.