Ravindra Dhangekar : सुसाट सुटलेल्या रवींद्र धंगेकरांना कोर्टानेच लावला 'ब्रेक'; समीर पाटलांवर केलेले आरोप अंगलट

Pune News : उपमुख्यमंत्री एकनाथ शिंदे यांच्या शिवसेनेचे महानगर प्रमुख रवींद्र धंगेकर यांनी सुरुवातीला कोथरूडच्या गुन्हेगारीच्या मुद्द्यावरून मंत्री चंद्रकांत पाटील यांच्यावर टीका केली. त्यानंतर जैन होस्टेलच्या जागेवरून केंद्रीय मंत्री मुरलीधर मोहोळ यांच्यावर निशाणा साधला. सातत्याने टीका करणाऱ्या रवींद्र धंगेकरांची एका प्रकरणांमध्ये न्यायालयाने बोलती बंद केले असल्याचं बोललं जात आहे.

भाजप नेते चंद्रकांत पाटील यांच्या निकटवर्तीय असलेल्या व्यावसायिक समीर पाटील यांनी धंगेकर यांच्याविरुद्ध कोर्टात क्रिमिनल केस आणि दिवाणी दावा दाखल केला असून, याबाबत कोर्टाने महत्त्वाचा निर्णय घेतला आहे.

गेले काही दिवस रवींद्र धंगेकर हे मंत्री चंद्रकांत पाटील यांच्यावर टीका करताना त्यांच्या अनुषंगाने सातत्याने समीर पाटील यांच्यावर गंभीर आरोप करीत आहेत. पुण्यातील कुख्यात गुंड निलेश घायवळ प्रकरणात बोलताना धंगेकर यांनी समीर पाटील यांच्यावर मकोका अंतर्गत कारवाई झाल्याचा आणि त्यांचा गुंडांशी साटेलोट्याचा दावा केला होता. यासाठी त्यांनी पुरावे म्हणून कथित फोटो आणि माहिती पुढे केली होती.

मात्र, या आरोपांचा कोणताही ठोस संदर्भ किंवा पुरावा नसल्याचा दावा करत समीर पाटील यांनी धंगेकर यांच्या या वक्तव्यांना राजकीय स्वार्थापोटी केलेले असल्याचे सांगितले. धंगेकर यांच्या या टीकेमुळे समीर पाटील यांच्या व्यवसायिक प्रतिमेला आणि वैयक्तिक आयुष्यात मोठा धक्का बसला असल्याचे पाटील यांनी पत्रकार परिषदेत सांगितले होते.

त्यानंतर , १४ ऑक्टोबर रोजी समीर पाटील यांनी धंगेकर यांना अब्रु नुकसानीची 50 कोटी रुपयांची नोटीस पाठवली होती. आता या नोटीशीची नंतर पाटील यांनी पुणे जिल्हा न्यायालयात क्रिमिनल मानहानीचा खटला आणि दिवाणी दावा दाखल केला आहे.

या दाव्याच्या सुनावणी दरम्यान धंगेकर यांनी कोर्टात आपली भूमिका मांडावी, असे सांगितले असतानाही त्यांनी ती भूमिका मांडली नाही. तसेच पुरावा देखील विशेष दिवाणी न्यायालयासमोर मांडला नाही आणि कोर्टामध्ये स्वतः हजरही राहीले नाहीत. सर्व बाजू विचारात घेऊन कोर्टाने समीर पाटील यांच्या बाजूने हा अंतरिम आदेश दिला आहे.

विशेष दिवाणी न्यायाधीश के.आर.सिंगल यांनी 11 नोव्हेंबर 2025 रोजी आदेश दिले आहेत. या आदेशात न्यायालयाने स्पष्ट निर्देश असे दिले आहेत. समीर पाटील यांच्या विरुद्ध कोणतेही बदनामीकारक वक्तव्य टिपणी यापुढील काळात खोटी माहिती प्रसारित करता येणार नाही. याबाबत सक्त मनाई कोर्टाने केली आहे.

याबाबत बोलताना समीर पाटील म्हणाले, गेल्या अनेक दिवस रवींद्र धंगेकर कोणतेही कारण नसताना कोणतेही पुरावे नसताना व्यक्तीदोष झाल्याप्रमाणे माझ्या विरोधात जे खोटारडे आरोप करत होते. यास माननीय न्यायालयाने प्रथमदर्शनी सुनावणी वरून त्यांच्या खोटारडेपणाची दखल घेऊन त्यांना अंतिम निकाल होईस्तोपर्यंत माझ्या विरोधामध्ये बोलण्यास बंदी केलेली आहे. याबद्दल माननीय न्यायालयाचे मी मनापासून आभार मानतो.