Crime News : गस्त घालणाऱ्या पोलिसांच्या गाडीवरच दगडफेक; पुण्यातील धक्कादायक प्रकार

पुणे : रात्रीच्या वेळी गस्त घालणाऱ्या पोलिसांच्या गाडीवरच दगडफेक केल्याचा धक्कादायक प्रकार समोर आला आहे. ही घटना वारजे माळवाडी परिसरात बुधवारी (दि.14) घडली आहे. याप्रकऱणी वारजे पोलीस (Warje police) ठाण्यात गुन्हा दाखल करण्यात आला आहे.

दिग्विजय काकाराम वाघमारे, व्यंकटेश पिळवणकर, अमोल निलेश पवार, लाल्या खान, आप्पा लोंढे, खंड्या वाघमारे यांच्यासह इतर जणांवर वारजे पोलीस ठाण्यात गुन्हा दाखल कऱण्यात आला आहे.

पोलिसांनी दिलेल्या माहितीनुसार, वारजे माळवाडी पोलीस ठाण्याचे वरिष्ठ पोलीस निरीक्षक दगडू हाके हे त्यांच्या कर्मचारीसोबत त्या भागात गस्त घालत होते. यावेळी त्यांना गणपती माथा येथील रॉयल पानशॉप रात्री उशिरापर्यंत सुरू असल्याचे दिसून आले. टपरी बंद करा आणि घरी जा असं पोलिसांनी सांगितल्यानंतर गर्दीत असलेल्या आरोपींनी जमाव करून पोलिसांच्या दिशेने दगडफेक केली आणि पळून गेले. या घटनेत सुदैवाने कोणाला दुखापत झाली नाही. वारजे पोलीस पुढील तपास करत आहेत.