Devendra Fadnavis: "राजकारणात खरं माहिती असलं तरी बोलायचं नसतं कारण..."; गडकरींच्या स्पष्टवक्तेपणावर भाष्य करताना फडणवीसांचं मोठ विधान

Nitin Gadkari Awarded by Lokmanya Tilak Purskar : केंद्रीय परिवहन मंत्री नितीन गडकरी यांना प्रतिष्ठेचा लोकमान्य टिळक पुरस्कारानं पुण्यात गौरवण्यात आलं. लोकमान्या टिळकांच्या पुण्यतिथीनिमित्त देण्यात येणारा हा पुरस्कार मुख्यमंत्री देवेंद्र फडणवीस यांच्या हस्ते गडकरींना प्रदान करण्यात आला.

यावेळी फडणवीसांनी गडकरींचं तोंडभरून कौतुक केलं. यावेळी व्यासपीठावर मंत्री चंद्रकांत पाटील, काँग्रेसचे ज्येष्ठ नेते सुशीलकुमार शिंदे, रोहित टिळक, उपमुख्यमंत्री एकनाथ शिंदे, अजित पवार आदी उपस्थित होते. गडकरींच्या स्पष्टवक्तेपणावर भाष्य करताना राजकारणात खरं माहिती असलं तरी बोलायचं नसतं असं विधानही त्यांनी केलं.

फडणवीस नेमकं काय म्हणाले?

नितीन गडकरी यांनी शिक्षणाच्या क्षेत्रात, आरोग्याच्या क्षेत्रात चांगलं काम केलेलं आहे. अनेक आरोग्याचे प्रकल्प नितीन गडकरी चालवतात. कुठल्याही गरजू गरिबाला ऑपरेशन करायचं असेल तर ते करुन देतात. हजारो लोकांच्या जीवनात त्यांनी परिवर्तन घडवलं. या कामाची त्यांनी कधीही जाहिरातही त्यांनी केली नाही. कधी याबाबत कुठला पुरस्कारही त्यांनी मिळवण्याचा प्रयत्न त्यांनी केला नाही. अतिशय संवेदनशील मानचे नितीन गडकरी आहेत.

सत्य माहिती असूनही बोलू नये

तसंच जे मनात येईल ते बोलणारे देखील नितीन गडकरी आहेत. त्यांनी कधीही याची चिंता केली नाही की याचा परिणाम काय होईल? राजकारणात अनेक वेळा सत्य माहिती असून देखील ते बोलू नये असं आपण ठरवतो. कारण दरवेळी सत्य बोलल्यानं त्या ठिकाणी फायदाच होतो असं नाही, राजकारणात बऱ्याचदा त्यामुळं नुकसान होतं. पण अशी परिस्थिती आलं तर नितीन गडकरी हमखास बोलतात, त्याचं कितीही नुकसान झालं तरी ते चिंता करत नाहीत. पण त्यामुळं त्यांची प्रतिमा देखील अशी झाली आहे की, ते सोईचं बोलणार नाहीत. पोलिटिकली करेक्ट बोलणार नाहीत तर त्यांच्या जे मनात आहे तेच ते बोलतील. त्यांचं स्पष्टवक्तेपणा आणि बोलणं लोकांना आवडतं.

अजितदादा, गडकरींमध्ये साम्य

अजितदादा आणि नितीन गडकरींमध्ये देखील एक साम्य आहे. कुठेही एकादं नवीन बांधकाम झालं की तिथे हे दोघे जाऊन त्यात काय चुकलं हे शोधून काढतात. यात थोडीशी जरी चूक मिळाली तरी सर्वांसमोर त्याची खरडपट्टी काढून पुढच्यावेळेस तो अशी चूक करणार नाही याची पूर्ण खात्री ते बाळगतात. त्यामुळं क्वालिटी हा नितीन गडकरी यांचा गुण आहे, अशा शब्दांत फडणवीसांनी गडकरींचं तोंडभरून कौतुक केलं.