Pune News : मुख्यमंत्री फडणवीसांमुळे पुणेकरांना रोज मनस्ताप? काँग्रेसचा गंभीर आरोप

Pune News : पुणे शहरात दिवसेंदिवस वाढत चाललेल्या वाहतूक कोंडीच्या समस्येनं पुणेकरांना मोठा मनस्ताप सहन करावा लागत आहे. ही वाहतुक कोंडी सोडवण्यासाठी सावित्रीबाई फुले पुणे विद्यापीठ चौक आणि सिंहगड रस्त्यावरील उड्डाणपूलांचं काम हे पूर्ण झालं आहे. मात्र, भाजपला या दोन्ही उड्डाणपूलाच्या उद्घाटनाचा इव्हेंट करायचा असल्यानं अद्याप हे पूल नागरिकांसाठी खुले करण्यात आले नसल्याचा आरोप काँग्रेसकडून करण्यात आला आहे. याबाबत महापालिका आयुक्तांना पत्र देखील देण्यात आला आहे.

मुख्यमंत्री देवेंद्र फडणवीस (Devendra Fadnavis) यांना वेळ मिळत नसल्याने या दोन पुलांचे उद्घाटन थांबले आहे, अशी माहिती समोर येत आहे. हा प्रकार पुणेकरांचा मनःस्ताप वाढविणारा आहे. सिंहगड रस्त्यावरील गंगा भाग्योदय चौक ते विठ्ठलवाडी या मार्गांवर उड्डाणपुलाचे काम पूर्ण झालेले आहे

तसेच विद्यापीठ चौकातील उड्डाणपुलाचे कामही पूर्ण झालेले असल्याने हे दोन्ही पूल वाहतुकीसाठी तातडीने खुले करून वाहनचालकांची कोंडीतून मुक्तता करून, त्यांना दिलासा द्यायला हवा, असे पत्र काँग्रेसने महापालिका आयुक्त नवल किशोर राम यांना दिले आहे.

या दोन्ही ठिकाणी नागरी वस्ती वाढली आहे. त्यामुळे रहदारीही वाढली आहे. या दोन्ही ठिकाणांवरून दिवसभरात अक्षरशः हजारो वाहने येत जात असतात. गर्दीच्या वेळी तीन-तीन तास वाहतूक कोंडी होते. आता गणेशोत्सव काळात वाहतुकीत अजून भरच पडेल. मग, पुणेकरांची कोंडी कशासाठी करत आहात? असा सवाल काँग्रेस नेते मोहन जोशी यांनी केला आहे.

सत्ताधाऱ्यांना उदघाटनाच्या निमित्ताने एक 'इव्हेंट' करून निवडणुकीत राजकारण साधायचे आहे. या वृत्तीला काँग्रेस (Congress) पक्षाचा विरोध आहे. प्रशासनाने हे पूल वाहतुकीसाठी खुले करावेत, अन्यथा काँग्रेस आंदोलन करेल, असा इशारा देखील देण्यात आला आहे.