Pimpri Chinchwad News : प्रशासक राजमुळे पिंपरी-चिंचवडकरांची कोंडी; नागरिकांची थेट आयुक्तांकडे गाऱ्हाणी!

पिंपरी : सध्या राज्यातील स्थानिक स्वराज्य संस्थात प्रशासकीय राजवट असल्याने अधिकाऱ्यांकडूनच नागरिकांच्या तक्रारींचा निपटारा होणे अपेक्षित आहे. मात्र तो होत नसल्याचे पिंपरी-चिंचवड महापालिकेत (Pimpri Chinchwad News) दिसून आले आहे.

नगरसेवकांची मुदत संपल्याने त्यांच्यामार्फत नागरी समस्या मार्गी लागण्यास गेल्या वर्षभरापासून ब्रेक लागलेला आहे. त्यामुळे प्रशासन तथा अधिकाऱ्यांनी या काळात कामाचा निपटारा करणे अपेक्षित आहे. मात्र, ते नागरिकांच्या तक्रारींची दखलच घेत नसल्याचे पिंपरी चिंचवडकरांची दुहेरी कोंडी झाली आहे.

पालिकेचे विभागप्रमुख तथा अधिकारीच दखल घेत नसल्याने रहिवासी थेट आयुक्त तथा प्रशासक शेखरसिंह यांच्याकडे आपले गाऱ्हाणे मांडू लागले आहेत. त्यातून हा गैरप्रकार समोर आला आहे. कार्यालयीन वेळेचेही अधिकारी पालन करीत नसल्यामुळे त्या दिवसाच्या कामाचा निपटारा त्याच दिवशी करण्याचे (झिरो पेन्डसी अँड डेली डिस्पोजल` ) उद्दिष्ट साध्य करण्यास प्रशासनाला अपयश आलेले आहे. त्यामुळे भेटीला येणाऱ्यांसाठी नोंदवही ठेवण्यास आणि भेटीच्या वेळेचा फलक लावण्यास प्रशासकांनी विभागप्रमुख तथा अधिकाऱ्यांना आज पुनश्च बजावले.

अभ्यांगतांकरिता नोंदवही ठेवून भेटीच्या वेळेचा फलक लावण्याचा आदेश राज्य सरकारने सात वर्षापूर्वी (०२.०२.२०१६) काढलेला आहे.त्यानंतर दोन वर्षांनी (१५.०२.२०१८) `झिरो पेन्डसी अॅन्ड डेली डिस्पोजल` ही कार्यपद्धती सरकारने अवलंबली. मात्र, हे दोन्ही आदेश धाब्यावर बसविण्यात आले असल्याचे पिंपरी महापालिका प्रशासकांना आढळून आले आहे.ही बाब प्रशासकीय कामकाजाच्या दृष्टीने अशोभनीय़ असल्याचे त्यांनी म्हटले आहे.

सायंकाळी चार ते पाच ही वेळ अभ्यांगतांच्या भेटीसाठी राखून ठेवण्याची आणि या कालावधीत इतर बैठका न घेण्याची वा दौरे आयोजित न करण्याची सूचना त्यांनी विभागप्रमुखांना केली आहे. तसेच या आदेशाचे काटेकोरपणे पालन करण्यासही त्यांनी सांगितले आहे.