Eknath Shinde Shivsena : 'ऑपरेशन टायगर' सुरू? माजी आमदार धंगेकर, बाबर, मोकाटे शिंदेंच्या शिवसेनेसोबत जाणार..?

Pune News : लोकसभा,विधानसभा निवडणुकीनंतर आता मुंबई,पुणे महानगरपालिकांसह स्थानिक स्वराज्य संस्थांच्या निवडणुकांकडे लक्ष लागलेलं आहे. महायुतीतील भाजप,शिवसेना आणि राष्ट्रवादी काँग्रेस पक्षांसह सर्वच राजकीय पक्षांनी जोरदार तयारी सुरू केली आहे. त्यातच आता आता उपमुख्यमंत्री एकनाथ शिंदे (Eknath Shinde) यांनी उद्धव ठाकरेंना धक्क्यावर धक्के देण्यास सुरुवात केली आहे. त्यातच आता कट्टर समर्थक असलेल्या महादेव बाबर यांनी ठाकरेंची साथ सोडत शिंदेंच्या शिवसेनेत प्रवेश करणार आहे.

हडपसर विधानसभा मतदारसंघाचे माजी आमदार महादेव बाबर यांनी गुरुवारी (ता.30) उपमुख्यमंत्री एकनाथ शिंदे यांची भेट घेतली आहे. त्यांचा शिवसेनेतील (Shivsena) प्रवेश निश्चित मानला जात आहे. हा आगामी पुणे महानगरपालिका निवडणुकीपूर्वी ठाकरेंसाठी मोठा धक्का मानला जात आहे.

उपमुख्यमंत्री आणि शिवसेनेचे मुख्य नेते एकनाथ शिंदे फेब्रुवारीच्या पहिल्या आठवड्यात पुण्यात मोठा राजकीय भूकंप घडवून आणणार असल्याची चर्चा आहे. यात काँग्रेस,उद्धव ठाकरे शिवसेना, मनसे यांच्यासह सर्वच राजकीय पक्षांचे तब्बल 25 माजी नगरसेवक शिंदेंच्या शिवसेनेत प्रवेश करणार असल्याची माहिती बाबर यांनी यावेळी दिली आहे. त्यामुळे हा निश्चित शिंदेंसाठी मोठं इनकमिंग मानलं जात आहे.

महादेव बाबर यांचा फेब्रुवारीच्या पहिल्या आठवड्यात एकनाथ शिंदेंच्या उपस्थितीत शिवसेनेत जाहीर प्रवेश होणार असल्याची माहिती समोर येत आहे. बाबर यांच्या पक्षप्रवेशामुळे शिवसेनेची पुण्यातील विशेषत: हडपसर परिसरात त्यांचं मोठं राजकीय वर्चस्व राहिलं आहे.त्यामुळे तिथे शिवसेनेची ताकद वाढणार आहे.

माजी आमदार असलेल्या महादेव बाबरांनी हडपसर मतदारसंघातून विधानसभा निवडणुकीसाठी जोरदार तयारी केली होती. ते तेथून निवडणूक लढवण्यास इच्छुक होते. मात्र,महाविकास आघाडीत ही जागा विधानसभा निवडणुकीत शरद पवारांच्या राष्ट्रवादी काँग्रेस पक्षाला मिळाली.त्यामुळे बाबरांना माघार घेण्याखेरीज गंत्यंतर राहिली नाही.

विधानसभा निवडणुकीत महाविकास आघाडीचा धुव्वा उडाल्यानंतर अनेक काठावरच्या नेत्यांनी महायुतीतील भाजप,शिवसेना आणि राष्ट्रवादी काँग्रेस पक्षाची वाट धरली आहे.आगामी महापालिका निवडणुकीसाठी भरभक्कम राजकीय पर्याय शोधण्यासाठी ही नेतेमंडळी प्रयत्नशील आहे.

कसबा पोटनिवडणुकीत काँग्रेसच्या रवींद्र धंगेकरांनी भाजपच्या ताब्यातून कसबा खेचून आणत मोठं यश मिळवलं होतं. त्यामुळे त्यांची पुणेच नव्हे तर राज्य पातळीवर चर्चा झाली होती.त्यानंतर त्यांना लोकसभेची उमेदवारीही देण्यात आली. पण भाजपच्या मुरलीधर मोहोळांनी त्यांना धोबीपछाड दिला. त्यानंतर भाजपच्या हेमंत रासनेंनी विधानसभा निवडणुकीतही धंगेकरांचा पराभव केला. या पराभवानंतर आता धंगेकर मोठा निर्णय घेण्याच्या तयारीत असल्याचं दिसून येत आहे.

काँग्रेसच्या रवींद्र धंगेकरांनी उपमुख्यमंत्री एकनाथ शिंदेंची गुरुवारी (ता.30) भेट घेतली आहे. यामुळे धंगेकर यांच्या शिवसेना प्रवेशाची चर्चा राजकीय वर्तुळात सुरू झाली आहे.