Sharad Pawar : सुप्रीम कोर्टाचा निकाल विरोधात गेला तरी शिंदे-फडणवीस सरकारवर परिणाम होणार नाही : पवारांचे महत्वपूर्ण विधान

बारामती : सर्वोच्च न्यायालयातील निकाल जरी मुख्यमंत्री एकनाथ शिंदे यांच्या विरोधात लागला तरी सरकारवर त्याचा फारसा परिणाम होणार नाही. कारण भाजप आणि शिंदे सरकारकडे बहुमत आहे, त्यामुळे सरकारवर परिणाम होईल, असे आपल्याला वाटत नाही, असे ज्येष्ठ नेते शरद पवार यांनी स्पष्टपणे सांगितले. (Even if Supreme Court verdict goes against it, it will not affect state government : Sharad Pawar)

राष्ट्रवादी काँग्रेसच्या अध्यक्षपदावरून पायउतार होण्याचा निर्णय मागे घेतल्यानंतर पवार (Sharad Pawar) बारामतीत आले होते. त्यावेळी माध्यमांशी बोलताना त्यांनी हे भाकीत वर्तविले. ते म्हणाले की आगामी लोकसभा निवडणूकीच्या पार्श्वभूमीवर देशाच्या पातळीवर विरोधकांची एकजूट होण्याची प्रक्रीया सुरु झालेली असताना मी बाजूला होणे योग्य नाही, असे अनेक मान्यवरांचे मत होते. तसेच, कार्यकर्त्यांची तीव्र भावना विचारात घेता मी राष्ट्रवादीच्या (NCP) अध्यक्षपदावरुन दूर होण्याचा निर्णय मागे घेतला. भाजपला पर्याय देण्यासाठी जे प्रयत्न सुरु आहेत, त्यात आपला सहभाग असेल, असेही त्यांनी स्पष्ट केले.

शरद पवार यांनी बारामतीत माध्यमांशी बोलताना या बाबत आपली भूमिका स्पष्ट केली. ते म्हणाले, पक्षाच्या अध्यक्षपदाच्या भूमिकेपासून दूर जाण्यासाठी मी तयार झालो होतो. गेल्या साठ वर्षांच्या राजकीय कारकिर्दीत मी लोकसभा, विधानसभा, राज्यसभा यापैकी कोठेतरी काम केले आहे. देशात सातत्याने ५६ वर्ष अशा पद्धतीने निवडून आलेले लोक मला तरी माहिती नाहीत.

बारामतीसह राज्य व देशातील लोकांनी आशीर्वाद दिल्यानेच मी ५६ वर्ष सक्रीय राजकारण करु शकलो. माझी अजूनही राज्यसभेची तीन वर्षे शिल्लक आहेत. गेल्या काही दिवसांपासून मला असे वाटत होते की, आपण पर्याय तयार करणे गरजेचे आहे, असेही पवार यांनी स्पष्ट केले.

गेल्या अनेक वर्षांपासून मीच जबाबदारी घेतो आहे, पण नव्या लोकांना संधी द्यायला पाहिजे व त्यांनीही जबाबदारी स्वीकारली पाहिजे, असे मला वाटत होते. मी बाजूला होणे, याचा अर्थ घरी बसणे असा नाही. लोकांमध्ये, कार्यकर्त्यांमध्ये राहणे, त्यांचे प्रश्न सोडविणे, हा मनाशी निश्चय करुन मी अध्यक्षपदावरुन दूर होण्याचा निर्णय घेतला होता. पक्षाच्या कार्यकर्त्यांची इतकी तीव्र प्रतिक्रीया येईल, अस मला कधी वाटल नाही, हे मला कबूल केल पाहिजे. त्या बाबतीत माझा अंदाज चुकला.

एक दोन दिवस कार्यकर्ते विरोध करतील, नंतर आपण समजूत काढू असा माझा अंदाज होता. पण, समजून घ्यायला कोणी तयार नव्हतं. आसामपासून केरळपर्यंत सर्वच प्रमुख लोकांच्या प्रतिक्रीया आल्या. यातही वर्षभरात लोकसभेच्या निवडणुका आहेत. विरोधकांची एकी होताना मी बाजूला होणे योग्य नव्हते. अनेक मान्यवरांच्या मतांचा आदर राखून मी हा निर्णय घेतला.