Pune Police : IPS अधिकारी बनला अन् थेट पुणे पोलीस आयुक्तालयात घुसला; मित्राच नाव घेताच बिंग फुटलं

Pune Police : थेट पुणे पोलिस आयुक्तात प्रवेश करुन आपण IPS अधिकारी असल्याची बतावणी करणाऱ्या तोतया अधिकाऱ्याला पुणे पोलिसांनी ताब्यात घेतले आहे. सागर वाघमोडे असे त्याचे नाव आहे, तो मुळचा सांगोला (जि. सोलापूर) येथील असल्याची प्राथमिक माहिती पुणे पोलिसांनी दिली.

पोलिस आयुक्तालयातील एका वरिष्ठ अधिकाऱ्याला भेटल्यानंतर वाघमोडे याने माझा मित्रही IPS असल्याचे सांगितलं. पोलिसांनी वाघमोडेला त्याच्या मित्राबाबत अधिक माहिती विचारली. त्याने नाव घेतलेला तो अधिकारी समोर आल्यानं बनावट आयपीएस अधिकाऱ्याचं पितळं उघडं पडलं. आता या प्रकरणी बंडगार्डन पोलिस ठाण्यात गुन्हा दाखल करण्यात आला आहे.

सागर वाघमोडे हा सोलापूर जिल्ह्यातील रहिवासी आहे. तो काही दिवसांपासून स्वतःला IPS अधिकारी म्हणून सांगत विविध ठिकाणी वावरत असल्याचे पोलिस तपासात उघड झाले आहे. वाघमोडे याचा वरिष्ठ पोलीस अधिकाऱ्यांना संशय आल्यानंतर त्यांनी अधिक चौकशी केली असता हा प्रकार समोर आला आहे.

वाघमोडे किती दिवसापासून पुण्यात होता? तो पोलीस आयुक्तालयात का आला? त्याचा काय उद्देश होता? तो कोणत्या अधिकाऱ्यांना भेटला? यापूर्वी त्याने IPS अधिकारी असल्याचे सांगून कोणाची फसवणूक केली आहे का? कोणाला आर्थिक गंडा घातला आहे का? अशा सर्व दिशेने पुणे पोलिस तपास करीत आहेत.