पुण्यात कोरोनाचा कहर : दिवसा जमावबंदी तर रात्री संचारबंदी

पुणे : कोरोनाच्या वाढत्या संसर्गामुळे सोमवारपासून (ता.१०) पुण्यात रात्री अकरा ते पहाटे पाच वाजेपर्यंत संचारबंदी (Curfew in Pune) लागू करण्यात येणार आहे. तर पहाटे पाच वाजल्यापासून रात्री अकरा वाजेपर्यंत जमावबंदी लागू करण्यात आली आहे.

पुण्याचे पोलीस सहआयुक्त डॉ.रविंद्र शिसवे यांनी हा आदेश काढला आहे. त्यामुळे आता दिवसा पाचपेक्षा जास्त नागरीकांना एकत्र येण्यास मनाई असणार आहे, तर रात्री संचारबंदीमुळे नागरीकांना विनाकारण फिरता येणार नाही.

राज्य सरकारने कोरोनाचा वाढता संसर्ग लक्षात घेऊन शनिवारी रात्री नवीन नियमांबाबत आदेश जारी केले. त्यानुसार पुणे पोलिसांनी रविवारी नवीन नियमांबाबतचे आदेश काढले आहेत.या आदेशाची सोमवारपासून अंमलबजावणी होणार आहे.डॉ. शिसवे यांनी दिलेल्या आदेशानुसार १० जानेवारीपासून पुढील आदेश येईपर्यंत दररोज रात्री ११ वाजल्यापासून दुसऱ्या दिवशी पहाटे पाच वाजेपर्यंत संचारबंदी राहणार आहे.

या कालावधीमध्ये नागरीकांना ठोस कारण असल्याशिवाय फिरता येणार नाही. तसेच पहाटे पाच वाजल्यापासून ते रात्री अकरा वाजेपर्यंत शहरात जमावबंदीचे आदेश लागू असणार आहेत. त्यामध्ये पाच किंवा पाचपेक्षा जास्त लोकांना एकत्र येता येणार नाही.संबंधित आदेशाचे उल्लंघन करणाऱ्या व्यक्तींविरुद्ध भारतीय दंड विधान संहिता कलम १८८ तसेच साथरोग अधिनियम १८९७ मधील तरतुदी शिक्षा शिक्षा होऊ शकते.

Edited By : Umesh Ghongade