कोथरूडचा कुख्यात गुंड शरद मोहोळ तडीपार; पुणे पोलिसांनी दिला आदेश

पुणे : कोथरूड भागात दहशत असलेला गुंड शरद मोहोळला शहरातून तडीपार करण्याचे आदेश पोलिस उपायुक्त पौर्णिमा गायकवाड यांनी दिला. शरद हिरामण मोहोळ (वय ३८, रा. माऊलीनगर, सुतारदरा, कोथरूड) याच्या विरोधात पुणे शहर, पिंपरी तसेच ग्रामीण भागात गंभीर स्वरूपाचे गुन्हे दाखल आहेत. (Sharad Mohol Crime News)

टोळीयुद्धातून गणेश मारणे टोळीतील पिंटू मारणे याचा खून नीलायम चित्रपटगृहाजवळ एका हॉटेलमध्ये शरद मोहोळ आणि त्याच्या साथीदारांनी केला होता. या गुन्ह्यात न्यायालयाने मोहोळला जन्मठेपेची शिक्षा सुनावली आहे. या प्रकरणात मुंबई उच्च न्यायालयाने (Mumbai High Court) मोहोळला गेल्या वर्षी जामीन मंजूर केला होता. कारागृहाबाहेर आल्यानंतर मोहोळ आणि साथीदारांनी दहशत गाजविण्याचे गुन्हे केले होते.

मोहोळला शहरातून सहा महिन्यांसाठी तडीपार करण्याचा प्रस्ताव कोथरूड पोलिस ठाण्याचे वरिष्ठ पोलिस निरीक्षक महेंद्र जगताप, गुन्हे शाखेचे पोलिस निरीक्षक बाळासाहेब बडे यांच्या मार्गदर्शनाखाली पोलिस कर्मचारी भास्कर बुचडे, अजय सावंत, अनिल बारड यांनी तयार केला. त्यानंतर मोहोळला शहरातून तडीपार करण्याचे आदेश देण्यात आले आहेत.