Pune News : ओबीसी नेते लक्ष्मण हाके यांच्यावर सातत्याने हल्ले होत आहेत. या हल्लेखोरांवर कडक कारवाई करण्याची मागणी हाकेंकडून करण्यात येत असतानाच आता राष्ट्रवादी काँग्रेस शरदचंद्र पवार पक्षाकडून मुख्यमंत्र्यांकडे हाकेवरील होणाऱ्या हल्ल्यांबाबत महत्वपूर्ण मागणी करण्यात आली आहे.
राष्ट्रवादी काँग्रेस शरदचंद्र पवार पक्षाचे पुणे शहराध्यक्ष प्रशांत जगताप म्हणाले, ओबीसी आंदोलक लक्ष्मण हाके यांच्या समर्थकांच्या गाड्यांवर जे हल्ले झाले आहेत. त्या हल्ल्यांचा राष्ट्रवादी काँग्रेस शरदचंद्र पवार पक्षाच्या वतीने मी तीव्र धिक्कार आणि निषेध करतो. राज्याचे गृहमंत्री आणि मुख्यमंत्री देवेंद्र फडणवीस आणि त्यांच्या संपूर्ण सरकारने या हल्ल्यांची चौकशी करावी आणि जे कोणी दोषी असतील त्यांच्यावर कायदेशीर कडक कारवाई करावी, ही आमच्या पक्षाची मागणी असणार आहे.
लक्ष्मण हाके हे सातत्याने शरद पवार यांना टार्गेट करताना पाहायला मिळत आहेत. त्यामुळे मला लक्ष्मण हाके यांना सांगायचं आहे की जेव्हा ते चड्डीत शाळेत, कॉलेजला जात होते जेव्हा त्यांना मिसरूड फुटलं नव्हतं, तेव्हा शरद पवार यांनी पहिल्यांदा या राज्यामध्ये ओबीसीला आरक्षण दिलं. त्या आरक्षणामुळेच ओबीसी समाज राज्यात शिक्षणात, नोकरीत आणि राजकारणामध्ये इतक्या मोठ्या प्रमाणात पुढे येऊ शकला आहे, असे जगताप म्हणाले.
महाराष्ट्र राज्याची स्थापना झाल्यानंतर 35 वर्ष कोणालाही आरक्षण देता आले नाही. ते शरद पवार साहेबांनी दिलं. याचा अभिमान आमच्यासारख्या कार्यकर्त्यांना आहे. मात्र शरद पवार आणि त्यांचे कार्यकर्ते हे ओबीसींचे मारेकरी आहेत, अशा प्रकारचं विनोदी वक्तव्याचा कार्यक्रम हाके यांनी सुरू केला आहे. त्याचं त्यांनी आत्मचिंतन करावं. अन्यथा ओबीसी समाज आणि इतर समाज हाके यांचा एक दिवशी योग्य तो समाचार घेतल्याशिवाय राहणार नाही, असं जगताप म्हणाले.
लक्ष्मण हाके हे जर सामाजिक कार्यकर्ते असतील तर त्यांनी समाजासाठी काय केला आहे. याचा लेखाजोखा त्यांनी मांडावा. राज्याचे गृहमंत्री आणि मुख्यमंत्री हे तुमचे आका आहेत. त्यांना तुमच्यावर आणि तुमच्या समर्थकांवर होणाऱ्या हल्ल्याची चौकशी करायला सांगा. परंतु निष्कारण महाराष्ट्राचं मनोरंजन करण्यासाठी बाष्कळ वक्तव्य केली जात आहेत ती थांबवा, असे जगताप यांनी स्पष्ट केले.
शरद पवार हे ओबीसींचे मारेकरी होऊ शकत नाही. मुख्यमंत्री पदाच्या कार्यकाळामध्ये शरद पवार यांनी पहिल्यांदा मंडल आयोग स्वीकारून ओबीसी समाजासाठी रेड कार्पेट टाकलं. ते ओबीसी आरक्षणाचे मारेकरी होऊ शकत नाहीत असा आमचा दावा असल्याचे जगताप म्हणाले.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.