Laxman Hake : बारामतीत मोर्चा काढणं लक्ष्मण हाकेंना भोवलं! पोलिसांनी तब्बल 14 जणांवर केली मोठी कारवाई

Laxman Hake News : मनोज जरांगे-पाटील यांच्या आंदोलनानंतर सरकारने हैदराबाद गॅझेट लागू करण्याचा निर्णय घेतला. त्यानंतर ओबीसी आंदोलक लक्ष्मण हाके यांनी या निर्णयाला विरोध करत थेट बारामतीमध्ये मोर्चा काढण्याची घोषणा केली. त्यांच्या या मोर्चाला पोलिसांनी परवानगी नाकारली होती. मात्र, हाके यांच्या नेतृत्वाखाली बारामतीमध्ये ओबीसींचा मोर्चा पाच सप्टेंबरला काढण्यात आला होता.

विनापरवानगी काढलेल्या या मोर्चाच्या विरोधात पोलिसांनी मोठी कारवाई करत लक्ष्मण हाकेंसह तब्बल 14 जणांवर गुन्हा दाखल केला आहे. पुणे जिल्हाधिकाऱ्यांच्या आदेशाचा भंग करत हा मोर्चा काढल्याचा ठपका हाकेंवर ठेवण्यात आला आहे.

लक्ष्मण हाकेंसह चंद्रकांत वाघमोडे, अमोल सतकर, पांडुरंग मेरगळ, नवनाथ पडळकर, किशोर मासाळ, गोविंद देवकाते, किशोर हिंगणे, बापूराव सोलनकर, विठ्ठल देवकाते, काळुराम चौधरी, बापू कवले, मंगेस ससाणे, जी बी गावडे आदींवर गुन्हा दाखल केला आहे. या प्रकरणी सहाय्यक पोलिस निरीक्षक महेश माने यांनी फिर्याद दिली होती.

पाच सप्टेंबरला ईद-ए मिलाद सण होता. तसेच सहा सप्टेंबरला गणेश विसर्जन आणि 9 सप्टेंबरला ईद-ए-मिलादची मिरवणूक होती. त्यामुळे कायदा सुव्यवस्थेचा प्रश्न निर्माण होऊ नये म्हणून पोलिसांनी मोर्चाला परवानगी नाकारली होती. मात्र, तरीदेखील विनापरवानगी मोर्चा पाच सप्टेंबरला काढण्यात आला. संशयितांनी दीड ते दोन हजार लोकांचा जमाव जमवून शारदा प्रांगण ते प्रशासकीय भवनापर्यंत घोषणबाजी केली, असे फिर्यादीमध्ये म्हटले आहे.