Lok Sabha Election 2024 : 'मावळातील गद्दारी मातीत गाडावी लागणार'; राऊतांचा बारणेंवर हल्लाबोल!

Maval News : मावळ लोकसभेतील आघाडीचे (ठाकरे शिवसेना) उमेदवार संजोग वाघेरे-पाटील यांच्या मध्यवर्ती कार्यालयाचे आज (ता.28) पिंपरीत शिवसेना नेते संजय राऊत यांनी उदघाटन केले. यावेळी त्यांनी देशात परिवर्तन होणार असून 4 जूननंतर नरेंद्र मोदी देशाचे पंतप्रधान नसतील, असा मोठा दावा केला. (Latest Marathi News)

प्रत्येक लोकसभेची जागा आपल्यासाठी महत्त्वाची आहे, विशेषत: मावळ लोकसभेत जिथे गद्दारी झाली, ती पूर्णपणे मातीत गाडावी लागणार आहे, असे सांगत राऊतांनी वाघेरेंचे प्रतिस्पर्धी आणि आघाडीचे (शिंदे शिवसेना) उमेदवार श्रीरंग बारणे यांच्यावर हल्लाबोल केला. शिवसेना फुटीनंतर बारणे हे एकनाथ शिंदे यांच्या गटात गेल्याने त्यांच्यावर राऊतांनी तोफ डागली. गेल्यावेळी मावळ लोकसभेत अजित पवारांचे पुत्र पार्थ पवारांचा बारणेंनी पराभव केला होता. त्यामुळे तेच पवार यावेळी बारणेंचा पराभव करतील, असा खळबळजनक दावा त्यांनी केला.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

मावळमधील स्वाभिमानी मतदार गद्दारांना जागा दाखविल्याशिवाय राहणार नाही, असा हल्ला वाघेरेंनीही बारणेंवर केला त्यामुळे मावळात (Maval) "मशाल' पेटल्याशिवाय राहणार नाही, असा दावा त्यांनी केला. काँग्रेसचे पिंपरी-चिंचवड अध्यक्ष कैलास कदम, सामाजिक कार्यकर्ते मारुती भापकर, छावा संघटनेचे धनाजी येळकर यांचीही भाषणे झाली.

ठाकरे शिवसेनेचे (Uddhav Thackeray) संपर्कप्रमुख तथा आमदार सचिन अहिर, राज्य संघटक एकनाथ पवार, जिल्हाप्रमुख माजी आमदार गौतम चाबुकस्वार, शहरप्रमुख ऍड. सचिन भोसले, शरद पवार राष्ट्रवादीचे शहराध्यक्ष तुषार कामठे, महिलाध्यक्षा ज्योती निंबाळकर, संघटीत कामगार विभागाचे काशिनाथ नखाते, मावळ लोकसभा प्रचारप्रमुख योगेश बाबर, स्वराज इंडियाचे नेते मानव कांबळे, सामाजिक कार्यकर्ते मारुती भापकर, उपजिल्हाप्रमुख रोमी संधू, राष्ट्रवादीच्या संघटीत कामगार विभागाचे काशिनाथ नखाते आदी यावेळी उपस्थित होते.