Narendra Modi : मोदींनी घेतला लोकसभेपासून धडा? पुण्यातील सभेत शरद पवारांवर एक शब्दही बोलले नाहीत

Pune News : पंतप्रधान नरेंद्र मोदी यांची पुणे जिल्ह्यातील महायुतीच्या उमेदवारांसाठी एस पी कॉलेज येथे सभा पार पडली. गेल्या काही वर्षांमध्ये मोदींनी पुण्यामध्ये घेतलेल्या सभांमध्ये राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांना लक्ष केल्याचं पाहायला मिळालं. त्यामुळे या सभेमध्ये पंतप्रधान नरेंद्र मोदी हे पुन्हा शरद पवारांना लक्ष करणार का ? याची उत्सुकता होती. मात्र पंतप्रधान नरेंद्र मोदी यांनी काँग्रेस आणि शिवसेना उद्धव बाळासाहेब ठाकरे पक्षावर निशाणा साधला मात्र शरद पवारांवर बोलणं टाळलं.

पुण्यातील सभेला उपमुख्यमंत्री अजित पवार उपस्थित होते.त्यामुळे त्यांच्या उपस्थितीत पंतप्रधान नरेंद्र मोदी शरद पवारांवर टीका करणार का ?असा प्रश्न उपस्थित केला जात होता. मात्र संपूर्ण सभेमध्ये पंतप्रधान नरेंद्र मोदी यांनी काँग्रेस आणि उद्धव ठाकरे यांना निशाणा केल्याचे पाहायला मिळालं मात्र त्यांनी शरद पवारांवर कोणतीही टीका करणे टाळले. त्यामुळे अजितदादांनी सुटकेचा निश्वास टाकल्याची चर्चा राजकीय वर्तुळ रंगली आहे.

मोदी म्हणाले, काँग्रेस आणि त्यांच्यासारख्या पक्षांनी नेहमीच महाराष्ट्राचा अपमान केला आहे. ही धरती छत्रपती शिवाजी महाराजांची धरती आहे. काँग्रेस आणि त्याचे मित्रपक्ष हे औरंगजेबच्या गोष्टी करतात. वीर सावरकरांची निंदा करतात. आघाडी सरकारला माझे चॅलेंज आहे. जर तुमच्या दम असेल तर वीर सावरकर आणि बाळासाहेब ठाकरे यांचं कौतुक राहुल गांधी यांना करायला सांगा. काँग्रेस अशी पार्टी आहे ज्यांच्याकडे नियत, नीती आणि नैतिकता अशी कोणतीच गोष्ट नाही. फक्त त्यांना सत्ता हवी आहे, असे टीका मोदींनी केली.

काँग्रेसने सत्तेसाठी देशाला फक्त तोडण्याचं काम केलं आहे. आता तीच काँग्रेस सत्तेसाठी दलित, मागासवर्गीय आणि आदिवासींना तोडण्याचं आणि विभागण्याचं खेळ करत आहे. एससी, एसटी आणि ओबीसीला वेगवेगळ्या जातीमध्ये वाटून त्यांची एकी तोडण्याचा प्रयत्न करत आहे.

काँग्रेस एससी एसटी आणि ओबीसी च वेगवेगळ्या जातींना भिडवण्याचं काम करत आहे. त्यातून या जातींना कमजोर करून त्यांच्या आरक्षण काढून घेण्याचा डाव काँग्रेस असल्याचा आरोप मोदींनी केला. त्यामुळे आपण एक राहू तरच सेफ राहू असा नारा पंतप्रधान नरेंद्र मोदी यांनी दिला.

लोकसभेपासून धडा

पंतप्रधान नरेंद्र मोदी यांनी लोकसभा निवडणुकीत शरद पवार यांच्यावर भटकती आत्मा अशी टीका केली होती. त्यामुळे लोकसभेला भाजपला आणि अजित पवारांच्या राष्ट्रवादीला भटका बसल्याचे विश्वेषण केले जात होते. त्यामुळे पुण्यात होणाऱ्या सभेत मोदी शरद पवारांवर काय बोलणार याची उत्सुकता होती. मात्र, लोकसभेपासून धडा घेत मोदींनी शरद पवारांवर टीका करण्याचे टाळले.