Anganwadi Employee News: अंगणवाडी, आशा कर्मचाऱ्यांना आर्थिक सुरक्षितता लाभणार! आता PF मिळणार

Pune News, 11 March 2026: राज्यातील अंगणवाडी सेविका, आशा कर्मचारी आणि अर्धवेळ परिचारिका म्हणून विविध सरकारी योजनांमध्ये काम करणाऱ्या कर्मचाऱ्यांसाठी गुड न्यूज आहे. ‘सीटू’ने यासंदर्भात सरकारकडे वारंवार पाठपुरावा केला होता.

आता या कर्मचाऱ्यांना भविष्य निर्वाह निधी (EPF) आणि पेन्शन योजनेचा लाभ मिळणार आहे. सुमारे ९ हजार १५ कर्मचाऱ्यांना भविष्य निर्वाह निधी (ईपीएफ) आणि पेन्शन योजना लागू करण्याचा महत्त्वपूर्ण निकाल प्रादेशिक भविष्य निर्वाह निधी आयुक्त अमित वशिष्ठ यांनी दिला.

आर्थिक सुरक्षितता लाभणार

आरोग्य, पोषण आणि महिला-बालकल्याण क्षेत्रात हे कर्मचारी अनेक वर्षांपासून मोठे योगदान देत होते मात्र त्यांना सामाजिक सुरक्षा मिळत नव्हती. या निर्णयामुळे हजारो कर्मचाऱ्यांना आर्थिक सुरक्षितता लाभणार आहे. यामुळे अंगणवाडी, आशा, कर्मचारी आणि अर्धवेळ परिचारिका म्हणून महिलांना मोठा दिलासा मिळाला आहे.

महत्त्वाचा निर्णय

सरकारी योजनामध्ये काम करीत असल्याने खासगी क्षेत्राचे नियम लागू होत नव्हते आणि कायमस्वरूपी कर्मचारी नसल्यामुळे सरकारी PF चा लाभही मिळत नव्हता. त्यामुळे हे कर्मचारी अनेक वर्षे अडचणीत होते. अमित वशिष्ठ यांनी जिल्हा परिषदेच्या विरोधामध्ये म्हणजेच महाराष्ट्र सरकारच्या विरोधामध्ये निकाल दिलेला आहे .

सेंटर ऑफ इंडियन ट्रेड युनियन्सचे (CITU) अध्यक्ष अजित अभ्यंकर आणि सरचिटणीस वसंत पवार यांनी कर्मचाऱ्यांच्या वतीने कायदेशीर लढा दिला. भविष्य निर्वाह निधी आयुक्तांकडे सादर केलेल्या कायदेशीर मुद्द्यांवरून हा महत्त्वाचा निर्णय देण्यात आला.

रक्कम 60 दिवसात जमा करा

प्रादेशिक भविष्य निर्वाह निधी आयुक्त अमित वशिष्ठ यांनी दिलेल्या निर्णयानुसार, पुणे जिल्हा परिषदेने कर्मचाऱ्यांचे आणि नियुक्ती करणाऱ्या आस्थापनांचे योगदान मिळून जवळपास १०८४ कोटी १३ लाख रुपये येत्या ६० दिवसांत जमा करण्याचे आदेश दिले आहेत.