'एक्सप्रेस वे' वर पोलिसांना सापडले घबाड; त्या चार कोटींचे कोल्हापूर कनेक्शन?

पिंपरी : पुणे-मुंबई एक्सप्रेस वे (Pune-Mumbai Expressway) वरून बेकायदेशीर शस्त्रांची तस्करी तथा वाहतूक होणार असल्याची टीप पुणे ग्रामीण पोलिसांना (Pune Police) सोमवारी (ता.२८) रात्री मिळाली होती. त्यानुसार लोणावळा ग्रामीण पोलिसांनी सापळा लावला. मात्र, त्यांना त्यात शस्त्रांऐवजी तब्बल चार कोटी रुपयांची बेहिशोबी रोकड मिळाली. एवढ्या नोटा पाहून क्षणभर पोलिसही गांगरून गेले होते. याप्रकरणी सांगलीच्या दोघांना ताब्यात घेतले आहे. विधानसभेच्या कोल्हापूर उत्तर (kolhapur by election) मतदारसंघ पोटनिवडणुकीसाठी ही रक्कम घेऊन जात असल्याचा संशय आहे.

मुंबईहून (Mumbai) पुण्याच्या दिशेने जाणाऱ्या मोटारीत (केए ५३ एमबी ८५०८) हे घबाड हाती लागले. ही सर्व रोकड पाचशे रुपयांच्या चलनी नोटांत आहे. याप्रकरणी मोटारचालक महेश नाना माने (रा. विटा, जि. सांगली) आणि त्याचा साथीदार विकास संभाजी घाडगे (रा. शेटफळ जि.सांगली) यांना पोलिसांनी ताब्यात घेतले आहे.

एवढी मोठी रक्कम कुठून कुठे व कोणत्या कारणासाठी नेण्यात येत होती. त्याबाबतचे समाधानकारक कारण हे दोघे पोलिसांना देऊ शकले नाहीत. हवालाचा हा प्रकार असण्याची शक्यता आहे. याबाबत पोलिसांनी आयकर विभागास कळवले आहे. फौजदार सचिन बनकर, अनिल लवटे, कर्मचारी सितारमा बोकड, युवराज बनसोडे, अमित ठोसर, पुष्पा घुगे, गणेश होळकर, किशोर पवार, सिद्धेश्वर शिंदे यांच्या पथकाने ही कारवाई केली.

दरम्यान, या संशयित मोटारीला थांबण्याचा इशारा करूनही ती थांबली नव्हती. म्हणून पोलिसांनी पाठलाग करून ती ताब्यात घेतली. तिची तपासणी केली असता त्यात हे घबाड सापडले आहे.