Manoj Jarange Patil : आधी शरद पवारांच्या पक्षाकडून इच्छुक, आता जरांगे पाटलांच्या आदेशानं भरला उमेदवारी अर्ज

Pune News : आगामी विधानसभा निवडणुकीत मराठा आंदोलक मनोज जरांगे पाटील यांनी ज्या ठिकाणी उमेदवार निवडून येण्याची शक्यता आहे. त्या ठिकाणी उमेदवार देण्याचे निश्चित केले आहे. त्याबाबतचा अंतिम निर्णय ते 30 तारखेला घेणार आहे.

पर्वती विधानसभा मतदारसंघातून राष्ट्रवादी काँग्रेस शरदचंद्र पवार पक्षाने अश्विनी कदम यांना उमेदवारी जाहीर केली आहे. या मतदारसंघातून सचिन तावरे देखील राष्ट्रवादी काँग्रेस(NCP) शरदचंद्र पवार पक्षाकडून निवडणूक लढवण्यास इच्छुक होते. त्यांना पक्षाची उमेदवारी न मिळाल्याने आता त्यांनी मराठा समाजाच्या वतीने अर्ज भरला असल्याचे बोलले जात आहे.

उमेदवारी अर्ज दाखल करण्याच्या आजच्या शेवटच्या दिवशी सचिन तावरे यांनी हातात संविधान घेत आणि 'एक मराठा लाख मराठा'च्या घोषणा देत शक्तिप्रदर्शन करत अर्ज दाखल केला आहे. पर्वती विधानसभा मतदारसंघात 1 लाख 30 हजार मराठा समाज समाजाची मत असल्याचं सांगण्यात येत आहे.

जरांगे पाटील यांनी 30 तारखेला विधानसभा निवडणुकीबाबत निर्णय घेतल्यानंतर पर्वती विधानसभा मतदारसंघात ते दोन सभा घेणार असल्याचा देखील तावरे यांच्याकडून सांगण्यात आला आहे.

उमेदवारी अर्ज दाखल केल्यानंतर माध्यमांशी बोलताना तावरे म्हणाले, मनोज जरांगे पाटील यांच्या आदेशानेच आज फॉर्म भरला आहे. विधानसभा निवडणुकीबाबत जरांगे पाटील उद्या निर्णय घेणार आहेत.

मात्र, त्यापूर्वी ज्या ज्या ठिकाणी निवडून येण्याची जास्त शक्यता आहे. त्या ठिकाणी उमेदवारांना अर्ज दाखल करण्यास सांगितले असल्याचा तावरे यांनी सांगितले. 30 तारखेला निर्णय झाल्यानंतर पर्वती विधानसभा मतदारसंघात दोन ठिकाणी जरांगे पाटील सभा घेतील असा विश्वास तावरे यांनी व्यक्त केला.