Jarange Patil Vs Chhagan Bhujbal : जरांगे पाटील पुण्यातून भरणार हुंकार; भुजबळ निशाण्यावर ?

Pune News : मराठा आरक्षणासाठी लढा पुकारून सरकारला जेरीस आणणारे मनोज जरांगे पाटील लवकरच आता पुण्यात सभा घेत आहेत. रूग्णालयातून त्यांना डिस्चार्ज देण्यात आला आहे. यानंतर ते पुण्यातील खराडी या भागात २० नोव्हेंबर रोजी एक जाहीर सभा घेत आहेत. या सभेत मराठा समाजाला ओबीसीतल्या समावेशावर विरोध करणारे राज्याचे मंत्री छगन भुजबळ निशाण्यावर असण्याची शक्यता आहे. (Latest Marathi News)

मनोज जरांगे यांनी २४ नोव्हेंबर ही मराठा आरक्षण जाहीर करण्यासाठी शेवटची मुदत दिली आहे. अंतरवाली सराटी येथील उपोषण नऊ दिवसांनंतर स्थगित केल्यानंतर जरांगे पाटील संभाजीनगर येथील रुग्णालयात दाखल झाले होते. रूग्णालयातून डिस्चार्ज मिळाल्यानंतर २० नोव्हेंबरला जरांगे पाटील यांची पुण्यात खराडी भागात सभा पार पडणार आहे, मराठा समाज बांधवांकडून याची जोरदार तयारी केली जात आहे.

राज्याचे मंत्री छगन भुजबळ यांनी मराठा समाजाचा ओबीसीत प्रवर्गात समावेशाबद्दल विरोध केला आहे. मराठा समाजाच्या या भूमिकेवर भुजबळ यांनी मोर्चा काढून जशास तसे उत्तर देण्याचे सुतोवाच केले. भुजबळांच्या वक्तव्यामुळे दोन समाजात विनाकारण वाद निर्माण होत आहेत, असे जरांगे पाटील म्हणाले. आम्ही आमच्या हक्काचे आरक्षण घेत नसून, कोणाच्या ताटातलं हिसकावून घेत नाही, कुणीही नाहक वाद करू नयेत, असे आवाहनही जरांगे यांनी केले. यानंतरही भुजबळ यांचे वक्तव्य होत असल्याने, त्यामुळे पुण्यातील सभेत जरांगे मुख्यत्वे भुजबळांना निशाण्यावर घेणार असल्याचे म्हटले जात आहे.

पुण्यातल्या या सभेसाठी पुणे शहरातील व आसपासच्या ग्रामीण भागातून मोठ्या प्रमाणावर मराठा समाज एकत्रित जमणार आहे. ओबीसी समाजाच्या आरक्षणाला विरोध नाही, त्यांच्या आरक्षणावर आक्रमण होत नाही, कारण कुणबी हे ओबीसीच असून आम्हाला आमच्या हक्काचं आरक्षण पाहिजे. विनाकारण दोन समूहांमध्ये भांडणं लावू नयेत, असे आवाहन जरांगेंनी केले.

(Edited By - Chetan Zadpe)