Maval ZP Election: मावळात साहेब अन् दादांची राष्ट्रवादी स्वबळावर! राज ठाकरेंचा महाविकास आघाडीला पाठिंबा

विजय सुराणा

तळेगाव दाभाडे: मावळ तालुक्यातील स्थानिक राजकारणात मोठा ट्विस्ट निर्माण झाला आहे. दोन्ही राष्ट्रवादी काँग्रेस पक्ष स्वबळावर निवडणूक लढवणार असल्याचं स्पष्ट झालं आहे. जिल्हा पातळीवर युती असली तरी तालुक्यात अजित पवार गटाकडून स्थानिक नेत्यांना विश्वासात न घेता थेट उमेदवार जाहीर करण्यात आल्याने ही युती होऊ शकली नाही

महाविकास आघाडीच्या वतीने जिल्हा परिषदेसाठी पाच तर पंचायत समितीसाठी नऊ असे एकूण १४ उमेदवारांचे अर्ज दाखल करण्यात आले असून, हे सर्व उमेदवार आपापल्या पक्षाच्या निवडणूक चिन्हांवर निवडणूक लढवणार आहे, अशी राष्ट्रवादी काँग्रेस (शरदचंद्र पवार गट) चे तालुकाध्यक्ष दत्तात्रय पडवळ यांनी दिली.

“मावळात आता आम्ही महाविकास आघाडीसोबत निवडणूक लढवत आहोत. आमचा थेट सामना अजित पवार राष्ट्रवादी आणि भाजपविरोधात असेल. आमदार सुनील शेळके व अजित पवार राष्ट्रवादीने स्थानिक कार्यकर्त्यांना विश्वासात घेतले नाही. कोणतीही सल्लामसलत न करता उमेदवारी जाहीर केल्यामुळे आम्हालाही स्वबळावर लढण्याचा निर्णय घ्यावा लागला,” असे पडवळ म्हणाले.

राष्ट्रवादी काँग्रेस (शरदचंद्र पवार), काँग्रेस, शिवसेना (उद्धव बाळासाहेब ठाकरे), मनसे आणि वंचित बहुजन आघाडी अशी महाविकास आघाडी मावळ तालुक्यात एकत्रितपणे निवडणूक लढवत आहे. जिल्हा किंवा पुणे पातळीवर दोन्ही राष्ट्रवादींमध्ये युती असली तरी मावळात स्थानिक पातळीवर समन्वय न झाल्याने हा संघर्ष अटळ आहे.

उमेदवारी अर्ज दाखल करताना काँग्रेसचे तालुकाध्यक्ष यशवंत मोहोळ, राष्ट्रवादी काँग्रेस (शरदचंद्र पवार) पक्षाचे ओबीसी सेलचे जिल्हाध्यक्ष अतुल राऊत, शिवसेना (उबाठा) तालुका प्रमुख आशिष ठोंबरे, मनसेचे तालुका प्रमुख अशोक कुटे, वंचित बहुजन आघाडीचे जिल्हाध्यक्ष संतोष लोखंडे, तालुकाध्यक्ष नितीन ओव्हाळ आदी पदाधिकारी व कार्यकर्ते उपस्थित होते.

धनशक्ती विरुद्ध जनशक्ती

नगरपरिषद निवडणुकीत राष्ट्रवादी काँग्रेसकडून पैशांचा मोठ्या प्रमाणात वापर झाल्याने सर्वसामान्य कार्यकर्ते निवडणूक प्रक्रियेपासून वंचित राहिले. पैशामुळे तालुक्यातील लोकशाही धोक्यात आली आहे. लोकशाही जिवंत ठेवण्यासाठी महाविकास आघाडीच्या माध्यमातून ही निवडणूक ताकदीने लढवणार असल्याचं काँग्रेसचे तालुकाध्यक्ष यशवंत मोहोळ यांनी सांगितलं.