PMC Election : महापौर मोहोळांच्या वाॅर्डाची तोडफोड.. प्रभागातच अडकविण्याचा प्रयत्न

पुणे : पुणे महापालिकेच्या आगामी निवडणुकीसाठी (PMC Election) प्रारुप प्रभागरचना जाहीर झाली असून सर्वच प्रमुख नेत्यांच्या सोईचे प्रभाग झाल्याचे चित्र आहे. असे असले तरी भाजप ज्यांच्या नेतृत्वाखाली निवडणूक लढणार आहे त्या महापौर मुरलीधर मोहोळ (Murlidhar Mohol) यांना मात्र घेरण्यात आल्याचे चित्र आहे. ते प्रभागातच अडकतील, अशी व्यवस्था प्रभागरचनेत झाल्याची चर्चा सुरू झाली आहे. महापौर मोहोळ यांच्या मूळ प्रभागाची पूर्णपणे मोडतोड करण्यात आली आहे. मोडतोडीनंतर महापौर मोहोळ यांचा प्रभाग तब्बल २९ चौरस किलोमीटरचा झाला आहे.

मोहोळ यांचा पौड फाट्यापासून सुरु होणारा प्रभाग थेट भूगाव हद्दीपर्यंत नेण्यात आलेला आहे. प्रभागाचा पसारा दूरवर पसरला असल्याने त्यांना सर्व मतदारांपर्यंत पोहोचण्यासाठी कसरत करावी लागणार आहे. एकीकडे महापालिका निवडणुकीसाठी शहर भाजपसाठी ते प्रमुख चेहरा असताना त्यांचे प्रभागात अडकणे, पक्षाला कितपत परवडणार हाही प्रश्न निर्माण झालेला आहे.

कोथरुड परिसर हा पूर्वीपासून भारतीय जनता पक्षाचा बालेकिल्ला राहिलेला असून कार्यकर्त्यांच्या मोठ्या फळीसह भाजपचे मतदारही या भागात बहुसंख्येने आहेत. या पार्श्वभूमीवर कोथरूडमधील प्रभाग रचना महत्त्वाची मानली जात होती. कोथरूडमध्ये भाजपेतर नगरसेवक निवडून यावेत, यासाठी विरोधकांनी आधीपासूनच कंबर कसली होती. त्यामुळे कोथरूडमधील निवडणूक ही शहरात चर्चेचा विषय ठरलेली आहे.

याबाबत महापौर मोहोळ `सरकारनामा`शी बोलताना म्हणाले, 'प्रभाग रचना कशीही झालेली असली तरी पुणेकर आमच्या पाठीशी आहेत. गेल्या पाच वर्षांत सामान्य पुणेकरांना केंद्रबिंदू ठेवूनच भारतीय जनता पक्षाने महापालिकेचा कारभार केलेला आहे. त्यामुळे या निवडणुकीत भारतीय जनता पक्षाला मतदानरुपी साथ मतदार देतील हा विश्वास आहे'.

'माझ्या प्रभागाची मोठ्या प्रमाणात मोडतोड झाली ही वस्तुस्थिती आहे. प्रभागाची रचना आणि पसारा पाहता, ही रचना नियमांना धरून झालेली नाही, असे माझेही प्राथमिक मत आहे. माझ्या प्रभागाची मोडतोड करुन मला प्रभागातच अडकवून ठेवता येईल. असे विरोधकांना वाटत असले तरी त्यांचा हा भ्रम होता, हे मतदारच मतदान करुन सांगतील, हा माझा विश्वास आहे', असेही महापौर मोहोळ म्हणाले.