किरकोळ वाद नडला : आंबेगावात माजी आयपीएस अधिकाऱ्याच्या मुलाचा खून

पुणे : पुण्यातील भारती विद्यापीठ पोलिस ठाण्याच्या हद्दीत किरकोळ कारणावरून झालेल्या तुंबळ हाणामारीत माजी आयपीएस अधिकारी रघुनाथ खैरे यांच्या मुलाचा टोळक्याने खून केला आहे. नरेंद्र रघुनाथ खैरे (वय ३३) असे खून झालेल्या तरूणाचे नाव आहे.

आंबेगाव परिसरात असणाऱ्या साई विश्व सोसायटीजवळील प्यासा बारच्या पार्किंगमध्ये मृत युवक नरेंद्र खैरे आणि टोळक्यातील युवकांशी किरकोळ कारणावरुन वाद झाला होता. नरेंद्र खैरे यांने बारच्या पार्किंग मधील आपली कार काढत असताना युवकांसोबत वाद झाल्यानंतर आरोपीने नरेंद्र खैरे यांना त्यांच्या नाजुक भागावर मारहाण करुन त्याला जखमी अवस्थेत खाली फेकून दिले. त्यात नरेंद्र खैरेचा मृत्यु झाला आहे.

नरेंद्र खैरेच्या खूनप्रकरणी युवराज कांबळे, ओंकार रिटे, वैभव आदाटे, मनोज सुर्य्रवंशी आणि विष्णू कदम या सहा जणांवर भारतीय विद्यापीठ पोलिस ठाण्यात गुन्हा दाखल करण्यात आला आहे. पुण्यासारख्या सुसंस्कृत शहरात माजी सनदी पोलिस अधिकाऱ्याच्या मुलाच्या खूनाची घटना घडल्याने पुणे शहरात कायदा व सुव्यवस्थेचा प्रश्न निर्माण झाला आहे.