Ajit Pawar News : अजितदादांनी राखलं कार्यकर्त्याचं मन; थेट आले अन् झेरॉक्सच्या दुकानात काढली प्रत

Pune News : राष्ट्रवादीचे नेते अजित पवार हे आपल्या खास शैलीसाठी ओळखले जातात. अजित पवार हे नेहमी रोखठोक बोलतात. आक्रमक स्वभाव असलेल्या अजित पवारांचे बारामतीत एक वेगळे रूप पहायला मिळाले.

अजित पवार यांच्याकडे एका झेरॉक्स दुकान चालकाने एक इच्छा व्यक्त केली. त्यानंतर अजित पवारांनी कार्यक्रमात व्यस्त असूनही आवर्जून दहा मिनिटे वेळ काढत आपल्या जिवाभावाच्या कार्यकर्त्याची इच्छा पूर्ण केली.

अजित पवार यांचा सोमवारी बारामती दौरा होता. या दौऱ्यादरम्यान विविध विकास कामांची पाहणी त्यांनी केली. त्यानंतर अजित पवार हे महाराष्ट्र दिनी प्रशासकीय इमारतीत ध्वजारोहणासाठी निघालेले असताना सुहास मढवी या कार्यकर्त्याने "माझ्या दुकानात मी सेकंडहँड झेरॉक्स मशीन घेतले आहे. त्याची झेरॉक्सची पहिली प्रत तुम्ही (अजित पवार यांनी) काढावी", अशी इच्छा त्यांच्याकडे व्यक्त केली.

त्यावर लगेच अजित पवारांनी क्षणाचाही विलंब न लावता होकार देत आपला मोर्चा थेट दुकानाकडे वळविला. अजित पवार यांनी सुहास मढवी यांच्या छोट्याशा दुकानाचे उद्घाटन केले. यावेळी अजितदादांनी झेरॉक्स कशी काढतात? हे देखील शिकून घेतले. तसेच दुकानदाराला त्याच्या दुकानासाठी शुभेच्छा दिल्या.

आपल्या झेरॉक्स दुकानाचे उद्घाटन अजितदादांनी केल्यामुळे दुकान चालकाचा आनंद गगनात मावेनासा झाला. त्यानंतर याबात प्रतिक्रिया देताना अजित पवार म्हणाले, "मी जर झेरॉक्स मशीनचे बटन दाबून दुकानदाराचे समाधान होत असेल तर कशाला त्याला नाराज करायचे? म्हणून झेरॉक्स दुकानाला भेट दिली".

Edited By- Ganesh Thombare