अजितदादांच्या प्रश्नावर देहू संस्थानचे अध्यक्ष हभप नितीन महाराज मोरे संतापले...

पिंपरी : देहू (Dehu) (ता.हवेली,जि.पुणे) येथील संत तुकाराम महाराज (Tukaram Maharaj) संस्थानच्या शिळा मंदिराचे नुकतेच (ता.१४ जून) पंतप्रधान नरेंद्र मोदी (Narendra Modi) यांच्या हस्ते उदघाटन झाले. त्यावेळी राजशिष्टाचार तथा प्रोटोकॉल डावलून स्थानिक लोकप्रतिनिधींना व्यासपीठावर बसू न देण्यात आल्याने या कार्यक्रमाला वादाचे गालबोट लागले. तसेच राज्याचे उपमुख्यमंत्री अजित पवार (Ajit Pawar) यांना भाषण करू न दिल्याने राष्ट्रवादी कॉंग्रेसच्या (NCP) रडारवर हा सोहळा गेला. दोन दिवसानंतरही त्याचे कवित्व संपले नसल्याचा प्रत्यय गुरुवारी (ता.१६ जून) पिंपरी-चिंचवडमध्ये पुन्हा आला. (Ajit Pawar Latest Marathi News)

उपमुख्यमंत्र्यांना का बोलू दिले नाही, असे देहूतील कार्यक्रमाचे आय़ोजक आणि संत तुकाराम महाराज संस्थानचे अध्यक्ष हभप नितीन महाराज मोरे यांना आज चिंचवडमधील एका पत्रकापरिषदेत विचारले असता ते भडकलेच. रागारागातच ते पत्रकापरिषद सोडून जाऊ लागले. ही परिषद बोलावलेले पिंपरीचे राष्ट्रवादीचे आमदार अण्णा बनसोडे तसेच भोसरीचे माजी आमदार विलास लांडे यांनी समजूत घातल्याने नितीनमहाराज पुन्हा खुर्चीत बसले. मात्र, शांत व संयमी किर्तनकार मोरे महाराज एवढे संतप्त झाल्याने त्याची चर्चाही झाली.

त्याचे असं झालं की २० तारखेला देहूतून पंढरपूरसाठी प्रस्थान ठेवणाऱ्या तुकोबारायांच्या पालखीच्या दररोजच्या पहाटेच्या अभिषेकासाठी लागणारे अभिषेक पात्र, मखर, सिंहासन असे पुजा साहित्य आ. बनसोडे यांनी २१ किलो चांदीतून बनवले आहे. १८ तारखेला त्याची मिरवणूक काढून त्याची विधीवत पूजा करण्यात येणार आहे. त्यानंतर ते येत्या सोमवारी (ता.२० जून) अजित पवार यांच्या हस्ते संस्थानकडे पालखी प्रस्थानापूर्वी देहू येथे सुपूर्त केले जाणार आहे. त्याबाबत माहिती देण्यासाठी बनसोडेंनी ही पत्रकारपरिषद त्यांच्या चिंचवड येथील जनसंपर्क कार्यालयात बोलावली होती. तिला मोरे महाराज तसेच संजय महाराज मोरे, पुंडलिक महाराज मोरे, भानुदास महाराज मोरे, संतोष महाराज मोरे, शेखर महाराज कुटे आदी उपस्थित होते.

यावेळी त्यांना दोन दिवसांपूर्वी देहू संस्थानने आयोजित केलेल्या कार्यक्रमात पवारांना का बोलू दिले नाही, असे विचारले असता नितीन महाराज चिडले. हा प्रश्न तुम्ही पवारांना का विचारत नाही, अशी उलट विचारणा त्यांनी हा प्रश्न विचारणाऱ्या पत्रकारालाच केली. तसेच ही पत्रकार परिषद कशासाठी आयोजित केली आहे, असे म्हणत हा प्रश्न विचारण्याची ही जागा नसल्याचे ते म्हणाले.