Sunil Shelke In Trouble : पिंपरी-चिंचवड राष्ट्रवादीने केली आमदार सुनील शेळकेंची अडचण

Pimpri Chinchwad News : मावळ तालुक्यातील पवना धरणातून बंद वाहिनीद्वारे पिंपरी-चिंचवडसाठी पाणी आणण्याच्या योजनेवरील बंदी राज्य सरकारने ता. ८ सप्टेंबर रोजी उठवली. ती आपल्या पाठपुराव्यामुळे उठल्याचा दावा भोसरीचे भाजपचे आमदार महेश लांडगे यांनी केला. त्यानंतर राष्ट्रवादी कॉंग्रेसच्या अजित पवार गटानेही उपमुख्यमंत्री अजितदादांमुळे ती उठल्याचा प्रतिदावा ठोकला. मात्र, त्यांच्या या दाव्यामुळे मावळचे राष्ट्रवादीचे आमदार सुनील शेळके यांची मात्र गोची झाली आहे. (Pimpri Chinchwad NCP made trouble for MLA Sunil Shelke)

पवना जलवाहिनी प्रकल्पावरील बंदी उठणे, हे अजितदादांचे पिंपरी-चिंचवडकरांना मोठे गिफ्ट असल्याची प्रतिक्रिया राष्ट्रवादी कॉंग्रेसचे (अजित पवार) शहराध्यक्ष अजित गव्हाणे यांनी दिली होती. तशीच ती त्यांच्या पक्षाचे पिंपरी पालिकेतील माजी विरोधी पक्षनेते नाना काटे यांनीही दिली होती. अजितदादांनी सत्तेत सहभागी होताच या प्रश्नात लक्ष घातले. महापालिकेत घेतलेल्या आढावा बैठकीत त्याचा उल्लेखही केला होता. त्याबाबत बैठकाही घेतल्या. त्यानंतर हा निर्णय झाल्याने दादांचे त्यात योगदान आहे, असे गव्हाणे म्हणाले आहेत. तसेच, त्यात इतरांचेही योगदान असल्याचे त्यांनी प्रांजळपणे कबूल केले होते.

गव्हाणेंच्या या दाव्यानेच आमदार शेळकेंना अडचणीत आणले आहे. कारण अजितदादा सत्तेत सामील झाल्यानंतर हा निर्णय झाला, असा मावळातील शेतकऱ्यांचाही दावा आहे. तो परवा आमदार शेळके यांनी खोडून काढला. अजितदादा सत्तेत आले अन् ही बंदी उठली, हे खरे असेल तर आमदारकीचा राजीनामा देईन, असे जाहीर आव्हान त्यांनी दिले होते.

अजितदादांनी माझ्या पश्चात हे काम सुरू करण्याचे आदेश दिले, तर पुढील निवडणुकीला उभाही राहणार नाही, असे ते पत्रकार परिषदेत गरजले होते. त्यामुळे पिंपरी-चिंचवडमधील त्यांच्या पक्षाच्या पवना बंदिस्त जलवाहिनी योजनेवरील भूमिका आणि वक्तव्ये यामुळे त्यांचीच अडचण झाली आहे. मात्र, नेमके खरे काय, हा प्रश्न आता पिंपरी-चिंचवडकरच तर नाही, मावळवासीयांनाही सतावतो आहे.

दरम्यान, आमदार शेळकेंच्या अडचणीत आणखी भर पडली आहे, ती पिंपरी-चिंचवडमध्ये लागलेल्या दहा मोठ्या फ्लेक्समुळे. गत टर्मअगोदर राष्ट्रवादीतून भाजपमध्ये जाऊन २०१७ ला नगरसेवक म्हणून निवडून आलेल्या व पुन्हा आता राष्ट्रवादीत दाखल झालेल्या माजी नगरसेविका माया संतोष बारणे यांनी ते लावले आहेत. त्यावर अजितदादांचा मोठ्या फोटोंसह मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांचेही फोटो आहेत. पवना जलवाहिनीवरील बंदी उठवून अजितदादांनी पिंपरी-चिंचवडकरांना मोठे गिफ्ट दिल्याचे त्यात म्हटले आहे, त्यामुळे शहरवासीयांचा पुढील २५ वर्षांचा पाण्याचा प्रश्न मिटणार असल्याने महायुती सरकारचे अभिनंदनही करण्यात आले आहे.