PMC Action on Motegaonkar: मोटेगावकरला दणका! पुण्यातील क्लासेस बंद; डेक्कनच्या इमारतीला महापालिकेनं ठोकलं टाळं

Shivraj Motegaonkar RCC classes controversy: NEET पेपरफुटीप्रकरणात नाव आल्यानं RCC क्लासेसचा सर्वोसर्वा प्रा. शिवराज मोटेगावकर सध्या सीबीआयच्या कोठडीत आहे. मोटेगावकरसह इतर अनेकांची यात नाव आल्यानं पेपरफुटीप्रकरणात मोठं कट-कारस्थान रचल्याचं आता उघड झालं आहे.

मोटेगावकरच्या अटकेनंतर गेल्या तीन दिवसांपासून तपास यंत्रणा देखील सतर्क झाल्या आहेत. मोठ्या प्रमाणावर फी आकारुन विद्यार्थ्यांची अशा प्रकारे होणारी फसवणूक रोखण्यासाठी आता पुणे महापालिकेनं देखील महत्वाची पावलं उचलली असून डेक्कन भागातील मोटेगावकर क्लासेसला सील करण्यात आल्याचं सांगितलं जात आहे.

नेमकी कारवाई काय?

डेक्कन भागात मोटेगावरच्या आरसीसी क्लासेसची शाखा आहे. एका खासगी इमारतीत भाडेतत्वावर घेतलेल्या जागेत हे क्लासेस सुरु आहेत. हे क्लासेस ज्या दोन मजल्यांवरील वर्गखोल्यांमध्ये चालतात ते दोन मजले महापालिकेनं सील केले आहेत. ही कारवाई करण्यामागे कारण म्हणजे संबंधीत इमारत उभारतानाच नियमांचं उल्लंघन झाल्याचं महापालिकेनं म्हटलं आहे.

या इमारतीला पूर्णत्वाचा दाखला आणि भोगवटा प्रमाणपत्र मिळालं नसल्याचं महापालिकेचं म्हणणं आहे. ही दोन महत्वाची कागदपत्रे नसतानाही ही इमारत उभी राहिली आणि तिचा व्यावसायिक कामासाठी वापर देखील केला जात आहे. याद्वारे इमारतीचं बांधकाम करणाऱ्यानं महापालिकेचा मोठा कर बुडवल्याचं स्पष्ट होत आहे.

डेक्कन भागातील या क्लासेसमध्ये मोठ्या प्रमाणावर विद्यार्थी शिक्षण घेत आहेत. या विद्यार्थ्यांची फसवणूक रोखण्यासाठीच प्रामुख्यानं महापालिकेनं हे पाऊल उचलल्याचं सांगितलं जात आहे. पण यासाठी तांत्रिक कारणं सांगून महापालिकेनं हा क्लास बंद केला आहे. त्यामुळं याप्रकरणी एकतर इमारतीच्या मालकाला संबंधित कागदपत्रांची पूर्तता केल्यानंतरच हे टाळं काढलं जाईल अन्यथा आरसीसी क्लासेसला इतर जागेमध्ये क्लास सुरु करावे लागतील.