PMC Election: 'रस्ता चुकलेल्या' भाजपच्या प्रचारगाड्या नागपूरातून थेट पुण्यात! पण करताहेत राष्ट्रवादीचा प्रचार; विषय पोहोचला पोलीस आयुक्तालयात

Pune News: महापालिका निवडणुकीचा प्रचार जोरात सुरू असताना एक मजेशीर प्रकार समोर आला आहे. नागपूरमधील भाजपच्या प्रचारासाठी विशेष तयार केलेल्या एलईडी लाइट्स आणि साऊंड सिस्टीमने सज्ज असलेल्या तब्बल २० प्रचार गाड्या अचानक पुण्यात दाखल झाल्या. पण आश्चर्याची गोष्ट म्हणजे या गाड्या चक्क राष्ट्रवादी काँग्रेसच्या प्रचारासाठी वापरल्या जात असल्याचं दिसून आलं आहे. ही माहिती कळताच नागपूर भाजपचे पदाधिकारी त्वरित पोलीस आयुक्तालयात धावले आणि या प्रकरणी कठोर कारवाई करण्याची मागणी त्यांनी केली. यामुळं 'गाड्या कोणाच्या, प्रचार कोणाचा' अशी चर्चा रंगली आहे.

महापालिका निवडणुकीचा प्रचार शिगेला पोहोचला असताना एक विचित्र प्रकार चर्चेचा विषय ठरला आहे. नागपूर भाजपने मतदारांपर्यंत पोहोचण्यासाठी 'छोटा हत्ती' स्वरूपातील विशेष प्रचारगाड्या तयार केल्या होत्या. या गाड्यांवर एलईडी स्क्रीन, साऊंड सिस्टीम आणि इतर आकर्षक सजावट करून प्रचार साहित्य लावण्यात आले होते. मात्र, प्रचाराच्या धामधुमीत या गाड्यांनी नागपूर सोडून थेट पुण्याची वाट धरल्याचं उघड झालं. आश्चर्याची गोष्ट म्हणजे, त्या गाड्या आता राष्ट्रवादी काँग्रेसच्या (अजित पवार) प्रचारासाठी वापरात असल्याचं उघड झालं आहे.

हा प्रकार समजताच नागपूर भाजपचे पदाधिकारी त्वरित पुण्यात धडकले. शुक्रवारी त्यांनी पुणे पोलीस आयुक्तालय गाठले आणि वरिष्ठ अधिकाऱ्यांची भेट घेऊन संबंधितांवर गुन्हा दाखल करण्याची मागणी केली आहे. पोलीस याप्रकरणाची सखोल चौकशी करत असून, गाड्यांचा शोध घेऊन नेमका प्रकार काय आहे? याची पडताळणी सुरू असल्याचं सांगितलं आहे. एकीकडं महापालिका निवडणुकीचा प्रचार जोरात सुरू असताना, दुसरीकडं या 'प्रचारगाड्यांच्या राजकीय स्थलांतरामुळं' मजेशीर चर्चा सुरू आहे.