Pune Census : धक्कादायक! जनगणना करणाऱ्या महापालिकेच्या महिला कर्मचाऱ्याला मारहाण, जाब विचारायला गेलेल्या मुलालाही मारलं

Pune News, 29 May : सध्या देशभरात जनगणनेचं काम सुरू आहे. महाराष्ट्रात देखील जनगणना सुरू करण्यात आली आहे. या कामासाठी विविध सरकारी कर्मचाऱ्यांची नियुक्ती करण्यात आली आहे. यामध्ये शिक्षकांसह विविध महापालिकेच्या कर्मचाऱ्यांचा समावेश आहे.

मात्र, हेच जनगणनेचं काम करणाऱ्या एका महिला कर्मचार्‍याला मारहाण केल्याची धक्कादायक घटना पुणे शहरात घडली आहे. जनगणना करणाऱ्या महिला कर्मचाऱ्याला 5 ते 10 जणांकडून आधी शिवीगाळ आणि मग मारहाण करण्यात आल्याची माहिती समोर आली आहे. धक्कादायक बाब म्हणजे या प्रकाराचा जाब विचारण्यासाठी गेलेल्या महिलेच्या मुलालाही स्थानिकांकडून मारहाण करण्यात आली आहे.

पुण्यातील महर्षीनगरमध्ये ही घटना घडली असून या प्रकरणी स्वारगेट पोलीस ठाण्यात गुन्हा दाखल करण्यात आला आहे. मिळालेल्या माहितीनुसार, 27 मे रोजी दुपारच्या सुमारास मीनाताई ठाकरे वसाहत या ठिकाणी जनगणनेच काम करत असताना आरोपी विकास मोरेंची पत्नी बहीण आणि पुतण्या या सर्वांनी जनगणनेच्या कामात अढथळा निर्माण करत संबंधित महिला कर्मचाऱ्याला शिवीगाळ केली.

त्यानंतर महिला कर्मचारी पुन्हा त्या भागात जनगणना करण्यासाठी गेल्या असता त्यांनी आधी झालेल्या वादा संदर्भात मोरे कुटुंबीयांची समजूत काढण्याचा प्रयत्न केला. मात्र, भांडणाच्या रागातून मोरे कुटुंबियांनी या महिलेला थेट लाथा बुक्क्या मारहाण केल्याची तक्रार संबंधित महिलेने पोलिसांमध्ये दिली आहे.

या महिलेच्या तक्रारीवरून पोलिसांनी विकास मोरे, क्रांती मोरे, मुक्ता कसबे, लीलावती मोरे, अभिजीत मोरेंसह अनोळखी पाच महिला व पुरुषांवर गुन्हा दाखल केला आहे. मात्र, सरकारी कामासाठी आलेल्या चक्क महिला कर्मचाऱ्यावर हात उचलल्याच्या घटनेवर नागरिकांसह जनगणनेचं काम करणाऱ्या कर्मचाऱ्यांकडून संताप व्यक्त केला जात आहे.

दरम्यान, या घटनेचा पीएमसी एम्प्लॉईज युनियनने निषेध केला असून, दहशतीमध्ये काम करणे शक्य नसून, जनगणनेच्या कामावर बहिष्कार टाकण्याचा इशारा युनियनचे अध्यक्ष बजरंग पोखरकर यांनी दिला आहे. “शासकीय कर्मचाऱ्यांवर वारंवार हल्ले होत असून, कर्मचाऱ्यांच्या सुरक्षेची जबाबदारी प्रशासनाने घ्यावी,” अशी मागणीही युनियनकडून करण्यात आली आहे.