Pune Crime News : पुणे हादरलं! प्रियकराकडून 22 वर्षीय तरूणीची थेट घरात घुसून हत्या

Pune Crime News, 08 May : मागील अनेक दिवसांपासून पुण्यात लहान मुलींसह महिलांवरील अत्याचाराच्या घटनांमध्ये वाढ झाल्याचं समोर येत आहे. वाढलेल्या अत्याच्याराच्या घटनांमुळे नागरिकांमध्ये भीतीचं वातावरण असतानाच पुण्यातील चंदननगर परिसरातून अशीच एक धक्कादायक घटना उघडकीस आली आहे.

प्रियकराने थेट प्रेयसीच्या घरात घुसून तिच्यावर चाकूने सपासप वार केल्याची घटना समोर आली आहे. या घटनेतील तरूणीचा उपचारा दरम्यान मृत्यू झाला आहे. ही हत्या प्रेमप्रकरणातून झाल्याचं आता उघडकीस आलं असून या हत्येप्रकरणी पोलिसांनी आरोपीला अटक केली आहे.

मिळालेल्या माहितीनुसार, आरोपी दिलीप राठोड आणि मयत तरूणी उजालादेवी दोहरे (२२) हे दोघेही पुण्यातील एका मॉलमध्ये एकत्र काम करत होते. याच मॉलमध्ये त्यांची ओळख झाली होती. काही दिवसांतच या ओळखीचे रूपांतर मैत्रीत झाले आणि पुढे दोघांमध्ये प्रेमसंबंध निर्माण झाले होते.

मात्र काही दिवसांपूर्वी उजालादेवी तिच्या मूळ गावी गेली असता तिच्या तिच्या कुटुंबियांनी तिचे लग्न दुसऱ्या मुलाशी ठरवलं. तरुणीने आपल्या लग्नाची ठरल्याची माहिती दिलीप याला दिल्यानंतर तो संतापला. त्याला हे लग्न मान्य नव्हतं. याच रागातून आरोपी दिलीप हा २९ एप्रिल रोजी रात्री ८ च्या सुमारास थेट तरुणीच्या चंदननगर येथील घरात घुसला.

घरात दोघांमध्ये वाद झाला आणि रागाच्या भरात दिलीपने तरुणीच्या गळ्यावर आणि शरीरावर चाकूने सपासप वार केले. या हल्ल्यात उजालादेवी गंभीर जखमी झाली होती. कुटुंबियांनी तिला तातडीने रुग्णालयात दाखल केलं होतं. मागील काही दिवसांपासून तिच्यावर रुग्णालयात उपचार सुरू होते. मात्र उपचारादरम्यान आता तिचा मृत्यू झाल्याची माहिती समोर आली आहे.

दरम्यान, या हत्ये प्रकरणी चंदननगर पोलीस ठाण्यात तरुणीच्या नातेवाईकांनी दिलेल्या तक्रारीनुसार पोलिसांनी आरोपी दिलीप राठोड याच्याविरोधात गुन्हा दाखल करून त्याला ताब्यात घेतलं आहे. न्यायालयाने आरोपीला ७ मेपर्यंत पोलीस कोठडी सुनावली आहे. मात्र, या घटनेमुळे परिसरात सध्या भीतीचं वातावरण निर्माण झालं आहे.