Pune News, 30 Dec : पुणे महानगरपालिकेच्या निवडणुकीमध्ये भाजप आणि एकनाथ शिंदे यांची शिवसेना एकत्रित लढेल अशी घोषणा मुख्यमंत्री देवेंद्र फडणवीस यांनी केली होती. फडणवीस यांनी निवडणूक जाहीर झाल्यानंतर लगेचच हा निर्णय जाहीर केला असला तरी आज उमेदवारी अर्ज दाखल करण्याचा शेवटचा दिवस उजाडला तरी देखील अधिकृतपणे युतीची घोषणा झालेली नाही.
भाजप आणि शिंदे सेनेतील चर्चा या इतक्या ताणल्या गेले आहेत की युती तुटण्याची शक्यता निर्माण झाली आहे. युतीच्या चर्चांमध्ये सुरुवातीपासूनच भाजप शिंदेंच्या शिवसेनेला फक्त एक अंकी जागा देण्याच्या तयारीत होतं. मात्रा वाटाघाटीनंतर भाजपने शिवसेनेला 15 जागा सोडण्याची तयारी दर्शवली. 165 पैकी फक्त 15 जागा लढण्यासाठी शिंदेंच्या शिवसेनेतील स्थानिक नेते सकारात्मक नसल्याचे चित्र पाहायला मिळालं.
तर शिवसेनेकडून किमान 25 जागा तरी पक्षाला मिळाव्यात असा आग्रह धरण्यात आला. आता ही युतीची वाटाघाटी 17 जागापर्यंत येऊन पोहोचली असल्याचे सांगितले जात आहे. मात्र जोपर्यंत भाजप सन्मानपूर्वक जागा देत नाही तोपर्यंत युती होणार नाही असं शिवसेनेच्या स्थानिक नेत्यांकडून सांगण्यात आलं आहे.
त्यामुळे एकीकडे युती तुटण्याच्या मार्गावर आली असताना शिंदेंच्या सेनेकडून मॅरेथॉन बैठका सुरू आहेत. काल रात्री उशिरा शिवसेनेकडून तब्बल 80 उमेदवारांना एबी फॉर्म वाटप करण्यात आल्याचं सांगितलं जात आहे. या सर्व उमेदवारांना अर्ज दाखल करण्यासाठी देण्यात आले आहेत.
युती तुटल्याबाबतची घोषणा काल रात्री बारा वाजता स्थानिक नेत्यांकडून करण्यात येणार होती. मात्र अचानकपणे उपमुख्यमंत्री एकनाथ शिंदे यांनी ही प्रेस कॉन्फरन्स थांबवून मंत्री उदय सामंत यांना पुण्याला रवाना केलं होतं. आता सकाळी दहा वाजता उदय सामंत आणि पुण्यातील वरिष्ठ नेते एकत्रित बैठक घेऊन आपला निर्णय जाहीर करणार आहेत.
त्यापूर्वी शिवसेनेने 80 जागांवर उमेदवारी अर्जाचा वाटप केलं असून आणखी 80 जागांवर उमेदवार तयार ठेवले असल्याचं सांगितलं जात आहे. त्यामुळे स्वबळावर 160 जागा लढण्याची तयारी शिंदे यांच्या शिवसेनेने केली असल्याचं समोर आलं आहे. त्यामुळे आता भाजप आणि शिवसेनेची युती होणार का? याचा निर्णय उदय सामंत घेणार असल्याचं समोर आलं आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.