Pune News : विधानसभेत 'कोयता गँग'चा प्रश्न उपस्थित होताच, हडपसरमध्ये पोलिसांचा 'रूट मार्च'!

Pune News : हडपसर पोलीस ठाण्याच्या (Hadapsar Police Station) हद्दीतील मांजरी येथे कोयता गँगने (Koyta Gang) दहशत पसरवली होती.याबाबत स्थानिक नागरिकांनी थेट मुख्यमंत्री एकनाथ शिंदे (CM Eknath Shinde) यांना निवेदनाद्वारे तक्रार केली होती. कोयता गँगचा प्रश्न आता थेट राज्याच्या विधानभवनात उपस्थित झाला आहे. कोयता गँगवर मोक्का लावा, अशी मागणी विधानसभेतील विरोधी पक्ष नेते अजित पवार यांनी आजच्या अधिवेशनात केली होती. याची दखल आता पोलिस प्रशासनाने घेतली आहे.

ज्या परिसरात कोयता गँगने दहशत पसरवली होती, त्या हडपसर भागात पोलिसांकडून "रुट मार्च" काढण्यात आला. दहशत पसरवणाऱ्या आणि गुन्हेगारी प्रवृतीला जरब बसावी, या हेतून पोलिसांनी रूट मार्चचे आयोजन केले होते. गेल्या काही दिवसांपासून कोयता गँगमुळे अनेक जणांना त्रास होत होता. या विरोधात मांजरी भागात स्थानिक नागरिकांनी पोलिस ठाण्यावर मोर्चा देखील काढला होता. कोयता गॅंग व्यापाऱ्यांना लुटत असून, यामुळे अनेक नागरिक भयभीत झाले आहेत, अशी तक्रार हडपसर आणि मांजरी भागातील स्थानिकांनी केली होती.

पुण्याचे नवीन पोलीस आयुक्त रितेश कुमार यांची नियुक्ती झाल्याच्या पहिल्याच आठवड्यात अशा प्रकारचा "रूट मार्च" काढण्यात आला आहे. हा प्रश्न विधानसभेतउपस्थित झाल्याने यावर आता तातडीने दखल घेण्यात आली. दरम्यान, राष्ट्रवादी काँग्रेसचे नेते खासदार अमोल कोल्हे यांनी देखील मुख्यमंत्र्यांना पत्र लिहून या कोयता गँग विरोधात कारवाई करा, अशी मागणी केली होती. दुसऱ्या बाजूला मात्र अशी कुठलीही गॅंग हडपसर भागात सक्रिय असणार नाही, अशी ग्वाही हडपसर पोलीस ठाण्याचे वरिष्ठ पोलीस निरीक्षक अरविंद गोकुळे यांनी दिली होती