Ajit Pawar: मी दिसायला देखणा, चिकणा..., कुणी जाऊन माझ्या बायकोला सांगा! असं अजितदादा का म्हणाले?

Pune News: ज्येष्ठ पत्रकार श्याम दौंडकर यांनी लिहिलेले धडपड भाग-३ या पुस्तकाचे प्रकाशन उपमुख्यमंत्री अजित पवार यांच्या हस्ते सोमवारी पुणे जिल्हा परिषद सभागृहात झाले. यावेळी त्यांनी विनोदी शैलीत तुफान फटकेबाजी केली. पुस्तकात अजितदादा यांच्याविषयीही भाष्य केले आहे. त्यावर अजितदादांनी टोलेबाजी केली आहे.

श्याम दौंडकर लिखित पुस्तकात अजितदादांचा उल्लेख देखणा-चिकणा असा केला आहे, हाच धागा पकडून अजितदादांनी तुफान फटकेबाजी केली. तात्यांचे (श्याम दौंडकर) यांचे माझ्यावर विशेष प्रेम असल्यामुळे त्यांनी माझे वर्णन देखणा-चिकणा, असे केले आहे. मी देखणा अन् चिकणा असेल, तर कुणीतरी माझ्या बायकोलाही हे सांगा, असे अजितदादांनी सांगताच सभागृहात उपस्थितांमध्ये हशा पिकला. आता मी देखणा-चिकणा आहे तर माझ्या बायकोलाही ते सांगा, कारण तिनं कधीच माझं कौतुक केलं नाही, असं अजितदादा म्हणाले.

लोकप्रतिनिधींचा संघर्ष नव्या पिढीला माहीत नसतो, तो दौंडकरांनी उलगडला आहे, असे ते म्हणाले. दौंडकरांनी अजितदादांचा उल्लेख देखणा-चिकणा, असा केला आहे, या मुद्दांवर बोलतांना अजितदादांनी मुख्यमंत्री देवेंद्र फडणवीस यांच्या मॉडेलिंग विषयी माहिती उपस्थितांनी दिली.

राजकारणात येण्यापूर्वी मी मॉडेलिंग करीत होतो, असे फडणवीसांनी मला सांगितले होते. त्यांचे तरुण वयातील फोटोही मॉडेलिंगसारखे आहेत, नंतर ते तरुणवयात महापौर झाले, त्यानंतर वरिष्ठांचे मार्गदर्शन मिळाले. ते दुसऱ्यांदा राज्याचे मुख्यमंत्री झाले, असे अजितदादा म्हणाले.

श्याम दौंडकर यांची एक रिक्षा चालकापासून ते जिल्ह्यातल्या पत्रकारितेपर्यंतची वाटचाल नक्कीच खडतर होती. पुणे जिल्ह्याचे अनेक प्रश्न त्यांनी आपल्या लेखणीतून समाजासमोर मांडले.ग्रामीण भागाची जाण असलेले पत्रकार म्हणून दौंडकर यांच्याकडे बघितले जाते, असे अजितदादा म्हणाले.

पुस्तक प्रकाशन कार्यक्रमाला आमदार शंकर मांडेकर,आमदार बापूसाहेब पठारे, जिल्हा परिषद मुख्य कार्यकारी अधिकारी गजानन पाटील, माजी जिल्हा परिषद अध्यक्ष जालिंदर कामटे यांच्यासह जिल्ह्यातील अनेक मान्यवर उपस्थित होते.