Pune News : कामगार दिनाला मारली दांडी : तब्बल २ हजार तीनशे कर्मचाऱ्यांवर कारवाईची टांगती तलवार !

Pune News : पुणे महानगरपालिकेच्या तब्बल २ हजार ३०० कर्मचाऱ्यांवर एकत्रितपणे कारवाईचा बडगा उचलण्यात येणार आहे. असे आदेशच महापालिकेच्या आयुक्तांनी काढले आहे. १ मे रोजी राज्यात सर्वत्र महाराष्ट्र दिन व कामगार दिन साजरा झाला. मात्र पुणे महानगर पालिकेच्या कर्मचाऱ्यांनी हा दिवस सुट्टीचा समजून कामावर गैरहजर राहिले.

याचा परिणाम असा झाला की, पुणे महानगर पालिकेच्या आयुक्तांनी पालिकेच्या तब्बल २ हजार ३०० कर्मचाऱ्यांवर कारवाई करण्याचे आदेश दिले आहेत. यामुळे आता पालिकेच्या कामगार वर्गामध्ये एकच खळबळ माजली आहे. १ मे रोजीच्या महापालिका वतीने आयोजित करण्यात आलेल्या कार्यक्रमात केवळ दोनशे कर्मचारी उपस्थित राहिले होते. यामुळे आता प्रशासनाकडून संताप व्यक्त केला जात आहे. यामुळे आता आयुक्तांनी तडकाफडकी कर्मचाऱ्यांवर कारवाईचे करण्याचे आदेश दिले आहेत.

जबाबदारीच्या दिवशी सुट्टी घेणे, आपल्या कर्तव्यात कसूर करणे असा ठपका कर्मचाऱ्यांवर ठेवण्यात य़ेणार असल्याचे बोलले जात आहे. महाराष्ट्र व कामगार दिनी पुणे महानगरपालिकेच्या २ हजार ३०० कर्मचाऱ्यांनी थेट दांडी मारली. यामुळे नियमानुसार त्यांच्यावर कारवाई केली जाणार आहे.