Pune News: एकाच रस्त्याचं दोनवेळा भूमिपूजन! सुप्रियाताईंनंतर अजितदादांच्या आमदारानं फोडलं नारळ

Pune News: पुण्याच्या भोर तालुक्यातील श्रीक्षेत्र बनेश्वर मंदिराकडे जाणाऱ्या रस्त्याचं राष्ट्रवादी काँग्रेसचे आमदार शंकर मांडेकर यांच्या हस्ते सोमवारी सायंकाळी भूमिपूजन झाले, यापूर्वी 7 जून रोजी याच रस्त्याचे भूमिपूजन राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांच्या हस्ते झाले होते. कामाच्या श्रेयवादासाठी दोन्ही राष्ट्रवादीकडून हे भूमिपूजन करण्यात आल्याचे परिसरातील नागरिकांनी सांगितले.

दोन्ही राष्ट्रवादी काँग्रेसकडून भूमिपूजन करण्यात आल्याने गावकऱ्यांनी आश्चर्य व्यक्त केले आहे. 7 जून रोजी खासदार सुप्रिया सुळे यांच्या हस्ते या रस्त्याचे भूमिपूजन झाले होते. एक भूमिपूजन सुप्रिया सुळे यांनी केलं तर त्याच रस्त्याच्या कामाच दुसरं भूमिपूजन अजितदादांचे आमदार शंकर मांडेकर यांनी केले आहे.

या रस्त्याचे काम व्हावं, यासाठी गेल्या अनेक महिन्यांपासून खासदार सुप्रिया सुळे यांच्यासह स्थानिक ग्रामस्थांकडून वारंवार पाठपुरावा केला जात होता, मात्र प्रशासनाकडून याची दखल घेतली जात नव्हती. त्यामुळे रस्त्याच्या कामाच्या मागणीसाठी खासदार सुप्रिया सुळे यांनी 9 एप्रिलला जिल्हाधिकारी कार्यालयासमोर उपोषण केले होते.