Pune Congress: शहराध्यक्षपदाच्या वादावर पडणार पडदा? काँग्रेस प्रदेशाध्यक्षांनी काढला तोडगा

Pune News: पुणे शहर काँग्रेसमध्ये गेल्या काही महिन्यांपासून सुरू असलेली अंतर्गत गटबाजी, शहराध्यक्ष पदावरून सुरू असलेली कुरघोडी आणि पक्षातून होणारी गळती यामुळे निर्माण झालेला गोंधळ अखेर थांबवण्यासाठी काँग्रेसचे प्रदेशाध्यक्ष हर्षवर्धन सपकाळ यांनी पुढाकार घेतला आहे. याच पार्श्वभूमीवर त्यांनी पुण्यातील काँग्रेसच्या वरिष्ठ नेत्यांना मुंबईत बोलावून घेतले आहे. उद्या (बुधवारी)मुंबईत महत्त्वपूर्ण बैठक होणार आहे.

बैठकीत पुण्यातील सर्व गटबाजी, मतभेद आणि पदांच्या वादावर चर्चा होणार आहे. त्यातून तोडगा काढण्याचा प्रयत्न सपकाळ करणार आहेत. विशेषतः शहराध्यक्ष पदाच्या बदलासंदर्भातील चर्चांना बैठकीत निर्णायक वळण मिळण्याची शक्यता आहे. सध्या या पदावरून अनेक इच्छुकांमध्ये स्पर्धा सुरू आहे. त्यामुळे पक्षातील अंतर्गत वातावरण अधिकच तापले आहे.

बैठकीला पुणे काँग्रेससाठी निरीक्षक म्हणून नियुक्त करण्यात आलेले सतेज ऊर्फ बंटी पाटील हेदेखील उपस्थित राहणार असल्याचं सांगितलं जात आहे. त्यांनी पक्षश्रेष्ठींना सादर केलेल्या अहवालावर सविस्तर चर्चा होणार आहे. त्या अहवालाच्या आधारावर पुणे काँग्रेसमधील बदल निश्चित होतील. पाटील यांनी सूचवलेले संघटनात्मक बदलही बैठकीत अंतिम केले जाऊ शकतात.

आगामी महापालिका निवडणुकीच्या तोंडावर काँग्रेसमधील सुरू असलेली गटबाजी, कुरघोड्या आणि गळती ही पक्षाला परवडणारी नाही. त्यामुळे आत्ताच या सर्व गोष्टींचा निकाल लावणे आवश्यक असल्याने हर्षवर्धन सपकाळ बैठकीनंतर शहराध्यक्ष पदाबाबत महत्त्वाचा निर्णय जाहीर करणार असल्याचं सांगितलं जाते.

सध्या शहरातील तीन गट, तीन इच्छुक उमेदवारांना शहराध्यक्ष करावं यासाठी ताकद लावताना पाहायला मिळत आहेत. यामध्ये सध्याचे शहराध्यक्ष असलेल्या अरविंद शिंदे यांचा एक गट, दुसरा गट माजी आमदार मोहन जोशी यांचा तर तिसरा गट माजी आमदार रमेश बागवे यांच्या नेतृत्वात असल्याचं पाहायला मिळत आहे.

त्यामुळे हर्षवर्धन सपकाळ नेमकं कोणाच्या पारड्यात आपलं मत टाकणार आणि कोणत्या गटाचा शहराध्यक्ष होणार आणि त्यावर इतर दोन गटांकडून नेमकी काय भूमिका घेतली जाणार याकडे सर्वांचेच लक्ष लागलेला आहे. सगळ्या गोष्टींवर हर्षवर्धन सपकाळ नेमका कोणता तोडगा काढणार हे देखील पाहणं महत्त्वाचं राहणार आहे.