Ravindra Dhangekar: मोठी बातमी! रविंद्र धंगेकर अजित पवारांच्या भेटीला; पुण्यातील बंगल्यावर मोठ्या घडामोडींना वेग

Ravindra Dhangekar: शिवसेनेचे महानगर प्रमुख रविंद्र धंगेकर हे राष्ट्रवादी काँग्रेसचे प्रमुख अजित पवार यांच्या भेटीसाठी त्यांच्या पुण्यातील जिजाई बंगल्यावर पोहोचले आहेत. त्यांच्यासोबत शिवसेनेचे अनेक नेते देखील आहेत. त्यामुळं नाराज असलेले धंगेकर कोणता मोठा निर्णय घेण्याच्या तयारीत आहेत की, अन्य गोष्टींसाठी हे भेट होत आहे, याची जोरदार चर्चा याक्षणी पुण्यातील राजकीय वर्तुळात रंगली आहे.

युतीचा प्रस्ताव?

रविंद्र धंगेकर यांच्यासोबत किरण साळी हे देखील अजित पवार यांच्या बंगल्यावर दाखल झाले आहेत. हे दोघेजण युतीचा प्रस्ताव घेऊन अजित पवारांकडं गेले असल्याची चर्चा आहे. म्हणजेच भाजप शिवसेनेला समाधानकारक जागा सोडण्यास तयार नसल्यानं शिंदेंची शिवसेना अजित पवारांच्या राष्ट्रवादीसोबत युती करण्याच्या तयारीत आहे. २५ ते ३० जागांचा प्रस्ताव घेऊन धंगेकर अजित पवारांच्या बंगल्यावर पोहोचले आहेत. त्यानुसार, अजित पवारांच्या जिजाई बंगल्यावर मोठ्या घडामोडींना सुरुवात झाली आहे.

धंगेकरांची नाराजी

दरम्यान, पुण्यात भाजप आणि शिवसेना यांच्यामध्ये जागा वाटपांबाबत बैठका पार पडल्या या बैठकीत शिवसेनेचे महानगर प्रमुख असलेल्या धंगेकरांना डावलण्यात आलं. भाजपनं देखील म्हटलं की, जर धंगेकर चर्चेसाठी येणार असतील तर ही चर्चा होणार नाही. यावरुन धंगेकरांना भाजपनं रोखून धरल्याची चर्चा होती. त्याचबरोबर धंगेकर यांनी आपल्या मुलासाठी अथवा पत्नीसाठी देखील तिकीट मागितलं पण याला भाजपकडून विरोध असल्याचं सुत्रांकडून कळतं आहे. त्यामुळं धंगेकर नाराज असल्याची चर्चाही आहे. त्यामुळं धंगेकर राष्ट्रवादीमध्ये प्रवेश करतात की काय? अशी चर्चाही सुरु झाली आहे.